Papa Françesku do të dalë nga spitali Gemelli i Romës sot dhe do të ketë nevojë për të paktën dy muaj pushim në Vatikan, thanë mjekët që e trajtojnë atë.
88-vjeçari u shtrua në spital më 14 shkurt me një infeksion të rëndë respirator që rezultoi me pneumoni të dyfishtë, raporton BBC.
Gjatë pesë javëve të fundit, ai paraqiti “dy episode shumë kritike” ku “jeta e tij ishte në rrezik”, tha Dr Sergio Alfieri, një nga mjekët që trajtonte Papën.
Papa Françesku nuk u intubua kurrë dhe mbeti gjithmonë vigjilent dhe i orientuar, tha Dr Alfieri. Papa nuk është shëruar plotësisht, por nuk ka më pneumoni dhe tani është në një gjendje të qëndrueshme, sipas mjekëve të tij.
“Sot jemi të lumtur të themi se nesër ai do të jetë në shtëpi”, u tha Dr Alfieri gazetarëve.
Papa do të ofrojë një bekim nga dritarja e tij në spitalin Gemelli të dielën – hera e parë që ai do të shfaqet në publik që kur u shtrua në spital – përpara se të kthehet në rezidencën e tij në Vatikan, transmeton KosovaPress.
Dr Alfieri tha se pacientët me pneumoni të dyfishtë humbasin pak zërin dhe “sidomos te të moshuarit do të duhet kohë që zëri juaj të kthehet në normalitet”.
Nëse trendi i përmirësimit vazhdon, thonë mjekët, Papa do të jetë në gjendje të kthehet në punë sa më shpejt të jetë e mundur.
Vatikani kishte thënë të premten se Papa kishte parë disa përmirësime në frymëmarrjen dhe lëvizshmërinë e tij.
Ai kishte konfirmuar se ai nuk përdor më ajrosje mekanike për të marrë frymë gjatë natës, por në vend të kësaj merrte oksigjen përmes një tubi të vogël nën hundë. Gjatë ditës, ai përdor më pak oksigjen me rrjedhje të lartë.
Papa është parë nga publiku vetëm një herë që kur u shtrua në spital, në një fotografi të publikuar nga Vatikani javën e kaluar, e cila e tregonte atë duke u lutur në një kishëz spitalore.
Në fillim të këtij muaji, një regjistrim audio i Papa Françeskut duke folur në spanjishten e tij amtare u luajt në sheshin e Shën Pjetrit në qytetin e Vatikanit.
Zëri i tij ishte pa frymë teksa falenderonte besimtarët katolikë për lutjet e tyre.
Papa Françesku ka kaluar gati 12 vjet si udhëheqës i Kishës Katolike Romake.
Ai ka vuajtur një sërë problemesh shëndetësore gjatë gjithë jetës së tij, duke përfshirë heqjen e një pjese të mushkërive të tij në moshën 21-vjeçare, duke e bërë atë më të prirur ndaj infeksioneve.
