Kryeministri i Shqipërisë Edi Rama u ka bërë sot thirrje emigrantëve shqiptarë në Greqi të shfrytëzojnë mundësitë e investimeve në fshat nëpërmjet Paketës së Maleve.
Ai në një takim me diasporën shqiptare në Kretë, tha se 500 aplikantët e parë do të kenë mundësinë të investojnë pa asnjë detyrim tatimor për 10 vjet.
“Keni shumë eksperiencë dhe dije, keni parë shumë dhe për këdo që do të kthehet ose të investojë atje, duhet të keni parasysh se ligji thotë se për 500 aplikantët e parë janë 10 vite pa taksë, TVSH dhe asnjë lloj detyrimi ndaj shtetit,” tha Rama, transmeton KosovaPress.
Kreu i qeverisë u shpreh se emigrantët që zotërojnë tokë në fshat, madje edhe pa dokumentin e pronësisë, mund të marrin një vërtetim nga këshilli bashkiak dhe të marrin lejen për të investuar në pronën e tyre, duke e kthyer atë në agroturizëm ose për projekte të tjera bujqësore dhe agropërpunuese.
Kujtojmë, Banka e Shqipërisë ka hapur tashmë një linjë kredie me një fond prej 250 milionë eurosh, ku shteti garanton 70 për qind të kolateralit për ata që aplikojnë.
Projektligji për “Paketën e Maleve”, ka për objekt përcaktimin e procedurave dhe të rregullave të posaçme për shpalljen e zonave malore me përparësi zhvillimi; zhvillimin e pasurive shtetërore të poseduara pa titull pronësie nga subjektet private në këto zona, në harmoni me rregullat e legjislacionin për planifikimin dhe zhvillimin e territorit; kalimin e pronësisë përmes shitjes me tarifën simbolike 1 euro të këtyre pasurive të paluajtshme shtetërore, të cilat rezultojnë të jenë në posedim faktik të poseduesve jo-pronarë.
Pas regjistrimit të kontratës së shitjes, pronari dhe investitori që ka lidhur marrëveshje me të kanë të drejtë të aplikojnë përkatësisht për pajisjen me leje ndërtimi, për pjesën e sipërfaqes në posedim për të cilën është lidhur kontrata, në përputhje me parashikimet e këtij ligji dhe të legjislacionit në fuqi për planifikimin dhe zhvillimin e territorit, për aq sa këto të fundit nuk bien në kundërshtim me këtë ligj. Leja e ndërtimit miratohet nga KKTU-ja.
