Kompania që zotëron OnlyFans është dënuar me një gjobë prej 1.05 milion funte për ofrimin e informacionit të pasaktë lidhur me masat që kishte në vend për verifikimin e moshës së përdoruesve të saj.
OnlyFans, e njohur për përmbajtje eksplicite seksuale, kërkon që përdoruesit të jenë të paktën 18-vjeç. Platforma përdor teknologjinë për vlerësimin e moshës duke analizuar një selfie të dërguar nga përdoruesit, për të përcaktuar moshën e tyre, raporton BBC.
Fenix, pronari i platformës, kishte deklaruar se çdo person që duket më i ri se 23- vjeç do të kërkohej të paraqiste një formë tjetër identifikimi.
Sidoqoftë, u zbulua se kufiri i caktuar nga teknologjia ishte 20 vjeç, jo 23 siç ishte deklaruar fillimisht. Ofcom, e cilësoi këtë si shkelje të detyrimit ligjor për të ofruar informacion të saktë dhe ka vendosur gjobën. Fenix ka pranuar gjobën dhe do ta paguajë atë, ndërsa shumën do ta merr Treasury.
Yoti, kompania që ofron teknologjinë e vlerësimit të moshës, tha se ishte Fenix që vendosi kufirin e moshës dhe jo Yoti, transmeton KosovaPress.
Kjo çështje është shqyrtuar nga Ofcom pas hetimeve të filluara në vitet 2022 dhe 2023. Me hyrjen në fuqi të Ligjit për Sigurinë në Internet (OSA), platformave si OnlyFans do t’u kërkohet të kenë masa të forta për verifikimin e moshës deri në korrik 2025.
