Një person i moshës 18-vjeçare ka goditur një furrë buke në Ferizaj, pasi më parë nuk ishte ndaluar në shenjën stop të policisë.
Rasti ka ndodhur dje rreth orës 13:28, në rrugën “Driton Islami”, kur njësia e policisë së trafikut rrugor i ka dhënë shenjë për t’u ndalur një veture të tipit Mercedes me targa vendore. Megjithatë, drejtuesi i automjetit nuk është ndalur dhe ka vazhduar lëvizjen me shpejtësi të madhe.
Gjatë përcjelljes policore, në rrugën “Vëllezërit Gërvalla”, i dyshuari ka shkaktuar një aksident trafiku duke goditur dhe dëmtuar objektin e një furre buke.
Për të gjitha veprimet policore është njoftuar prokurori i shtetit dhe i dyshuari M. Sh. (18) është shoqëruar në stacionin policor në Ferizaj.
Pas intervistimit është iniciuar rasti për veprën “Shkaktim i rrezikut të përgjithshëm” për procedurë të rregullt, ndërsa i janë shqiptuar gjoba kundërvajtëse për mosrespektim të shenjës “Stop” të policit dhe drejtim të automjetit pa e fituar të drejtën për patentë shoferi.
