Dikur një aktivitet i rastësishëm, puna si influencer është shndërruar në një profesion kryesor në shumë vende të botës. Me rritjen e platformave si Instagram, TikTok, YouTube dhe Twitch, shumë individë kanë ndërtuar karriera të plota, duke fituar shuma marramendëse nga bashkëpunimet me brendet dhe përmbajtja e sponsorizuar, përcjell KosovaPress.
Në të kaluarën, shumica e influencerëve e shihnin këtë angazhim si një punë sekondare, por sot, emrat më të njohur në botën digjitale fitojnë miliona dollarë në vit. Sipas studimeve të fundit, influencuesit më të mëdhenj në Instagram mund të paguhen deri në 1 milion dollarë për një postim të vetëm, ndërsa krijuesit e përmbajtjes në YouTube dhe TikTok fitojnë nga reklamat, donacionet dhe bashkëpunimet.
Sipas analizave të fundit, marketingu i influencerëve pritet të arrijë një vlerë prej mbi 24 miliardë dollarësh deri në fund të vitit 2025. Kompanitë e mëdha po investojnë gjithnjë e më shumë në këtë sektor, pasi influencuesit kanë ndikim të drejtpërdrejtë tek audienca e tyre dhe krijojnë një lidhje më autentike me konsumatorët sesa reklamat tradicionale, përcjell KosovaPress|T.
Disa nga influencerët më të pasur në botë përfshijnë emra si Kylie Jenner e cila fiton miliona për çdo postim të sponsorizuar në Instagram. MrBeast (Jimmy Donaldson), krijuesi më i paguar në YouTube me fitime mbi 100 milionë dollarë në vit. Charli D’Amelio, një nga yjet më të mëdha të TikTok me bashkëpunime shumë të paguara bashkë me Kim Kardashian e kthyer në një biznesmene të fuqishme falë rrjeteve sociale
Edhe pse mund të duket si një punë e lehtë, të qenit influencer kërkon strategji, kreativitet dhe vazhdimësi. Suksesi në këtë fushë nuk vjen vetëm nga numri i ndjekësve, por edhe nga angazhimi, autenticiteti dhe aftësia për të krijuar përmbajtje tërheqëse.
Ndërsa rrjetet sociale vazhdojnë të zhvillohen, puna si influencer vetëm sa do të rritet më shumë, duke e bërë këtë profesion një nga më të lakmuarit e kohës moderne.
