Një njoftim në formë dokumenti i publikuar në një faqe që poston përmbajtje nga veprimtaria e Spitalit ilegal të Pasjanit, ka treguar detajisht se ku shkuan dhe si i mashtrua populli serb në Kosovë me 20 mijë dinarët e premtuara nga qeveria e Serbisë, qysh para se të nis fushata zgjedhore për zgjedhjet e fundit që u mbajtën në Kosovë.
Sipas kësaj letre, bëhet fjalë për mbi 450,000.00 euro të cilat kryetari i komunës ilegale te Novoberdes Sasha Millosheviq është duke planifikuar t’i ndajë për një njësi banimi.
Ne letër shpjegohet e gjithë situata mashtrimi që iu bë serbëve që jetojnë në Kosovë. Madje, thuhet se me paratë që ishin ndarë për ndihmën e serbëve të Kosovës, tashmë ka nisur ndërtimi i disa banesave fiktive të cilat pretendohet se do iu jepen komunitetit rom që jetojnë në fshatin Kufcë e Epërme.
“Po përballemi me një situatë të rrezikshme të vjedhjes dhe zhvatjes së parave shtetërore që aktualisht po zhvillohet nën arsyetimin e ndërtimit të banesave për popullsinë rome në fshatin Kufcë e Epërme, e që janë para të destinuara ekskluzivisht për popullin serb që jeton në Kosovë. Ajo që është premtuar është 20.000 dinarë, disa i kanë marrë, e të tjerëve që u takojnë u është hequr e drejta për ti marrë”, thuhet në letër.
Sipas kësaj letre, vendimin për të mos i dhënë para një pjese të serbëve, e ka marrë kryetari i organit të përkohshëm paralel në Gjilan, Sasha Millosheviq.
“Me ato para ka blerë një tokë si truall për ndërtimin e banesave për romët, të cilët planifikon t’i vendosë në Kufcë të Epërme dhe të rrisë trupin votues për veten. Tokën e ka blerë nga një punonjës i komunës së Kufcës, Goran Paunoviq për një çmim qesharak. Këtë Goranin ai e ka punësuar me një diplomë të falsifikuar në bibliotekën e Pasjanit”, vazhdon letra e cila i drejtohet popullit serb në Kosovë të cilën thonë se këtë mashtrim dhe vjedhje ky zyrtar i lartë serb nuk e ka bërë i vetëm.
“Sasha Millosheviq nuk është i vetëm këtu, i përfshirë është edhe dikush nga Beogradi. Të hetohet gjithçka!”.
E nuk është veç ky keqpërdorim që u raportua në këtë letër drejtuar serbëve të Kosovës.
Aty po paralajmërohet edhe një vjedhje tjetër nga po të njëjtat para (20 mijë dinarë) që për destinacion kishin fillimisht ndihmën financiare për të gjithë serbët që jetojnë në tokën e Kosovës.
Sipas kësaj letre, bëhet fjalë për mbi 450.000 euro të cilat po i njëjti zyrtar, Sasha Millosheviq është duke planifikuar t’i ndajë për një njësi banimi.
“Ai po i shpenzon këto para me ndihmën e dikujt nga Beogradi, sepse vetë nuk do të mundte të shpenzonte kaq shumë”
Në këtë letër përveç që pretendohet se i është treguar e vërteta popullit serb që jeton në Kosovë, po kërkohet që kjo gjë të bëhet e madhe dhe të kërkohet drejtësi qoftë edhe në Serbi, nga vendi ku edhe vijnë këto para në emër të ndihmës për serbët në Kosovë.
“Ky njeri (Sasha Mllosheviq) mashtron njerëzit, kërcënon njerëzit. Po vidhemi kudo që është e mundur…tash nëpërmjet banesave fiktive që shërbejnë për shpëlarje parash. Nëse dikush pretendon se kjo nuk është e vërtetë, atëherë ju lutemi ta demantojë me argumente. Sepse ne e dimë që është e vërtetë dhe kot përpiqeni ta fshihni”.
/KosovaPress/
