Bordi i Drejtorëve në Korporatën Energjetike të Kosovës (KEK), ka liruar nga detyra Bekir Gërguri nga pozita e kryeshefit ekzekutiv, dhe Ramadan Budakova nga pozita e zëvendës kryeshefit ekzekutiv, të cilët kanë qenë ushtrues të detyrës tash e një vit.
Sipas njoftimit Bordi i Drejtorëve ka marr vendim për shpalljen e konkursit publik për pozitën e kryeshefit ekzekutiv të KEK Sh.A., dhe ka udhëzuar menaxhmentin që konkursi të shpallet ditën e hënë, më 3 mars 2025, raporton KosovaPress.
“Bordi i Drejtorëve (BD) të KEK Sh.A., “duke qenë i përkushtuar për qeverisjen e korporatës në përputhje me përgjegjësitë dhe kompetencat që rrjedhin nga Ligji për Ndërmarrjet Publike, si dhe parimet e njohura ndërkombëtare për qeverisjen korporative të ndërmarrjeve publike, në mbledhjen e mbajtur dje, më datë 27.02.2025, ka marrë këto vendime: Bordi i Drejtorëve ka vendosur të lirojë Bekir Gërguri nga pozita e kryeshefit ekzekutiv, dhe z. Ramadan Budakova nga pozita e zëvendës kryeshefit ekzekutiv, të cilët kanë qenë ushtrues të detyrës tash e një vit”, thuhet në njoftim, transmeton KosovaPress.
Në pozitën e kryeshefit ekzekutiv (u.d.) të KEK, Bordi ka emëruar Gramos Hashani, i cili deri tani ka mbajtur pozitën e zyrtarit kryesor financiar dhe thesarit (ZKFTH) në KEK Sh.A. Ndërsa, në pozitën e ZKFTH (u.d.) të KEK Sh.A., është emëruar z. Gëzim Paci, i cili deri tani ka mbajtur pozitën Menaxher i Pasurisë në Divizionin e Financave.
Në fund, Bordi i Drejtorëve ka falënderuar Gërguri dhe Budakova për sië thuhet “kontributin e tyre të deritanishëm, e sidomos për menaxhimin e situatës së krijuar pas sulmit në Kanalin e Ibër Lepencit, dhe u ka uruar suksese në angazhimet e mëtutjeshme brenda Korporatës”.
Më 19 prill 2023, me urdhër të Prokurorisë Speciale ishte arrestuar kryeshefin ekzekutiv të KEK-ut, Nagip Krasniqi. Krasniqi sipas Prokurorisë, ishte arrestuar për shkak të dyshimit se ka kryer “Keqpërdorimi i pozitës apo autoritetit zyrtar”, “Ushtrimi i ndikimit” dhe “Konflikti i interesit”. Një ditë pas arrestimit, Gjykata Themelore në Prishtinë i ka caktuar masën e paraburgimit prej një muaji për Nagip Krasniqin.
Ndërkohë, më 25 prill 2024 Bordi i kompanisë publike të KEK-ut, ka pezulluar nga detyra e kryeshefit Nagip Krasniqin.
/KosovaPress/
