Humoristi amerikan Conan O’Brien do të rikthehet si prezantues i ceremonisë së çmimeve Oscar në mars të vitit 2026, pasi bëri debutimin e tij këtë vit, njoftoi sot Akademia e Hollivudit.
“Conan ishte prezantuesi i përsosur – ai na udhëhoqi nëpër mbrëmje me humor, ngrohtësi dhe respekt”, thanë në një deklaratë kryetari i Akademisë, Bill Kramer, dhe presidentja Janet Yang, shkruan LUSA.
I cituar në të njëjtin tekst, Conan O’Brien deklaroi se arsyeja e vetme pse do të rikthehej në Oscars vitin e ardhshëm është “për të dëgjuar [aktorin] Adrien Brody të përfundojë fjalimin e tij”, duke iu referuar faktit se Brody – fitues i çmimit për Aktorin më të Mirë këtë vit, për filmin “The Brutalist” – mbajti fjalimin më të gjatë në historinë e Oscars, me pesë minuta e 40 sekonda.
Akademia e Arteve dhe Shkencave të Filmit kujtoi se transmetimi televiziv i çmimeve Oscar këtë vit arriti në 19.69 milionë shikues, që përbën shifrën më të lartë në pesë vitet e fundit dhe një rritje prej 1% krahasuar me vitin 2024.
Conan O’Brien, 61 vjeç, bëri debutimin e tij si prezantues i Oscar-ëve në edicionin e këtij viti. I njohur si preazantues i disa emisioneve televizive të natës, ai ka qenë edhe skenarist për “Saturday Night Live” dhe “The Simpsons”, si dhe vijon të drejtojë podcastin e tij “Conan O’Brien Needs a Friend”, siç rikujtoi Akademia në biografinë e ndarë për të, transmeton KosovaPress.
Kritikët ishin pothuajse unanimë në vlerësimin e performancës së O’Brien si prezantues i ceremonisë, ku ai pasoi Jimmy Kimmel.
Ceremonia e 98-të e çmimeve Oscar do të zhvillohet më 15 mars të vitit të ardhshëm, në Hollivud, Shtetet e Bashkuara të Amerikës.
