Japonia ka zbuluar kohët e fundit rezerva të pasura mineralesh të rralla në fund të Oqeanit Paqësor pranë ishullit Minami-Tori-shima, rreth 2000 km larg Tokios, të cilat mund të transformojnë ekonominë japoneze dhe rolin e saj në zinxhirët e furnizimit teknologjik global.
Këto minerale, kyçe për teknologjitë e avancuara si automjetet elektrike, bateritë dhe burimet e rinovuar të energjisë, përfaqësojnë burime strategjike që Japonia mund t’i përdorë për pavarësinë e saj ekonomike dhe energjetike.
Hulumtimi i kryer nga Fondacioni Nippon dhe Universiteti i Tokios zbuluan një fushë me sfera të pasura me mangan në thellësi rreth 5700 metra nën nivelin e detit.
Këto sfera përmbajnë metale jashtëzakonisht të vlefshme, si kobalti, i cili është thelbësor për prodhimin e baterive dhe lidhjeve rezistuese ndaj korrozionit, nikel, i cili është thelbësor për bateritë dhe industrinë e çelikut të pandryshkshëm, dhe bakri, i cili është një metal bazë për infrastrukturën elektrike dhe elektronikë.
Sipas vlerësimeve, rezervat totale përfshijnë më shumë se 610,000 ton kobalt dhe 740,000 ton nikel, gjë që e bën këtë vendburim një nga më të mëdhenjtë në botë. Me çmimet aktuale të tregut vlera e tyre llogaritet në rreth 26.3 miliardë dollarë dhe me rritjen e nevojës për to mund të rritet ndjeshëm.
Deri më tani, Japonia ka qenë shumë e varur nga importet e mineraleve të rralla, veçanërisht nga Kina. Me zbulimin e ri, Japonia ka mundësi për të reduktuar varësinë nga importet dhe për të forcuar sigurinë e energjisë.
