Në një botë ku shumica e njerëzve komunikojnë në një ose dy gjuhë, Ziad Fazah, një poliglot me origjinë nga Libani, ka habitur botën me pretendimin e tij se flet rrjedhshëm mbi 60 gjuhë të ndryshme. Ky rekord e bën atë një nga individët më gjuhë-folës në histori, duke e vendosur emrin e tij mes poliglotëve më të mëdhenj të njohur ndonjëherë, përcjell KosovaPress.
I lindur në vitin 1954 në Monrovia, Liberi, dhe i rritur në Liban, Ziad Fazah zhvilloi një pasion të madh për gjuhët që në moshë të re. Ai pohon se i ka mësuar të gjitha gjuhët e tij kryesisht përmes vetëstudimit, duke lexuar libra, dëgjuar biseda dhe praktikuar me të huaj.
Sot, ai jeton në Brazil dhe ka marrë vëmendje ndërkombëtare për aftësitë e tij të jashtëzakonshme. Nëpër intervista dhe demonstrime televizive, ai është përpjekur të tregojë njohuritë e tij në gjuhë të ndryshme, duke përfshirë anglishten, frëngjishten, gjermanishten, rusishten, kinezishten, japonishten, greqishten, arabishten dhe shumë të tjera, përcjell KosovaPress.
Megjithëse Ziad Fazah është përmendur shpesh si njeriu që flet më shumë gjuhë në botë, disa ekspertë gjuhësorë dhe studiues kanë shprehur dyshime mbi rrjedhshmërinë e tij në të gjitha këto gjuhë. Në disa intervista televizive, ai ka hasur vështirësi në kuptimin e pyetjeve ose në dhënien e përgjigjeve të sakta në disa gjuhë, duke ngritur dyshime mbi nivelin e tij të vërtetë të rrjedhshmërisë.
Pavarësisht këtyre polemikave, ai mbetet një figurë e jashtëzakonshme në botën e poliglotëve dhe një simbol i pasionit për të mësuar gjuhë të huaja. Historia e tij frymëzon njerëzit që duan të zgjerojnë njohuritë e tyre gjuhësore dhe tregon se, me dedikim dhe përkushtim, kufijtë e dijes mund të shtyhen gjithnjë e më tej.
