Janë identifikuar mbetjet mortore të Elhami (Qamil) Tahiragës nga Rahoveci, njoftoi të mërkurën Komisioni Qeveritar për Persona të Pagjetur.
Elhami Tahiraga ishte në listën e personave të zhdukur gjatë luftës në Kosovë, raporton KosovaPress.
Sipas njoftimit të Komisionit, familja është njoftuar dhe identifikimi është kryer përmes metodës shkencore të AND-së.
“Pas 26 vitesh, falë identifikimit të kryer me metodën shkencore të ADN-së, është bërë e mundur identifikimi i mbetjeve mortore [eshtrave] të Elhami [Qamil] Tahiraga nga Rahoveci, i cili figuronte në Listën e Personave të Zhdukur që nga periudha e luftës në Kosovë”, shkroi Komisioni të mërkurën në Facebook, përcjellë KosovaPress.
Komisioni i ka shprehur solidaritet dhe mbështetje të sinqertë familjes Tahiraga “duke shpresuar që ky identifikim t’u sjellë sadopak lehtësim pas një pritjeje të gjatë e të dhimbshme”.
Në Kosovë vazhdojnë të jenë të pagjetur rreth 1.600 persona të zhdukur me dhunë nga forcat serbe gjatë luftës së fundit.
/KosovaPress/
