Kandidati i Partisë Demokratike të Kosovës (PDK) për kryeministër, Bedri Hamza, gjatë një tubimi me qytetarët e Suharekës, ka premtuar ndërtimin e një autostrade të re, e cila do të lidhë Qafën e Duhlit me Lipjanin, duke krijuar një nyje strategjike për tri autostradat kryesore të vendit.
Hamza deklaroi se ky projekt është jetik për zhvillimin ekonomik dhe përmirësimin e lidhjeve infrastrukturore mes rajoneve të Kosovës dhe shqiptarëve në rajon. Autostrada e re do të përfshijë kyçjet Qafa e Duhlit–Carralevë e Shtime–Lipjan, duke përfunduar në Banullë.
“Ne do të ndërtojmë segmentin e lidhjes së tri autostradave, që përfshijnë kyçjen Qafa e Duhlit–Carralevë e Shtime–Lipjan me kyçje në Banullë. Kjo është një nyje strategjike që do të lidhë korridoret rrugore kryesore të Kosovës, përkatësisht Autostradën e Kombit, që na lidh me Shqipërinë, atë “Arbën Xhaferi” që na lidh me shqiptarët e Maqedonisë së Veriut, si dhe autostradën Prishtinë–Gjilan–Dheu i Bardhë, që na lidh me shqiptarët e Luginës së Preshevës”, ka thënë Hamza.
Hamza u zotua se zëri i qytetarëve të Suharekës do të jetë gjithmonë i dëgjuar në qeverisjen e tij.
Zgjedhjet parlamentare në Kosovë do të mbahen më 9 shkurt.
Marketing
Video
