Parisi dhe Berlini zyrtar kanë reaguar ashpër pas deklarimeve të zëvendëspresidentit amerikan JD Vance se problemi i vërtetë i BE-së nuk është Rusia, por problemet e brendshme dhe pamundësia për të përcaktuar një strategji të përbashkët sigurie pa SHBA.
JD Vance tha në Konferencën e Munihut se ishte “koha për të rivlerësuar mbështetjen e SHBA-së për Ukrainën” dhe i bëri thirrje Evropës të marrë më shumë përgjegjësi.
Fjalimi i tij shkaktoi reagime të ashpra nga zyrtarët evropianë dhe ukrainas, ndërsa në Rusi shkaktoi entuziazëm.
Kancelari gjerman Olaf Scholz tha sot në platformën X, se e djathta ekstreme duhet të përjashtohet nga procesi i vendimmarrjes politike dhe se refuzojnë çdo ide bashkëpunimi me të djathtën ekstreme dhe nuk u takon të tjerëve të japin këshilla për këtë.
Më herët, Scholz mbrojti me forcë qëndrimin e tij kundër ekstremit të djathtë, duke thënë se vendi i tij nuk do të pranonte njerëz që “përpiqen të ndërhyjnë në demokracinë tonë”.
Udhëheqësi i opozitës konservatore gjermane Friedrich Merz është bashkuar me rivalët e tij politikë në dënimin e sulmit të zëvendëspresidentit amerikan JD Vance ndaj qasjes së Evropës ndaj gjuhës së urrejtjes dhe të djathtës ekstreme.
“Ne u përmbahemi rregullave të vendosura nga institucionet tona demokratike,” tha Merz gjatë një paneli diskutimi në Konferencën e Sigurisë në Munih.
Gjermania është një mbrojtëse e vendosur e lirisë së fjalës, “por lajmet e rreme dhe gjuha e urrejtjes janë subjekt i kufizimeve ligjore,” shtoi Merz.
Ministri i Jashtëm francez Jean-Noël Barrot ka hedhur poshtë kritikat e ashpra nga JD Vance se demokracia është në rënie në Evropë dhe pohoi se “liria e shprehjes është e garantuar në Evropë”.
“Askush nuk është i detyruar të miratojë modelin tonë, por askush nuk mund të na imponojë të tyren,” tha Barrot në X përpara fjalimit të tij në Konferencën e Sigurisë në Munih.
Fjalimi i JD Vance habiti liderët evropianë për sulmin e tij ndaj “lirisë së shprehjes”, për të cilën ai tha se ishte “në rënie” në Evropë dhe mbi politikat e migracionit të kontinentit. Ai synoi veçanërisht partitë tradicionale gjermane që kundërshtojnë çdo aleancë me AfD.
“Ne mblidhemi në këtë konferencë, natyrisht, për të folur për sigurinë. Dhe zakonisht mendojmë për kërcënimet ndaj sigurisë sonë të jashtme… Por ndërsa administrata Trump është shumë e shqetësuar për sigurinë evropiane dhe beson se mund të arrijmë një zgjidhje të arsyeshme midis Rusisë dhe Ukrainës, ne gjithashtu besojmë se është e rëndësishme që Evropa të sigurojë mbrojtjen e saj në vitet e ardhshme”, filloi Vance.
“Kërcënimi që më shqetëson më shumë për Evropën nuk është Rusia, nuk është Kina, nuk është ndonjë faktor tjetër i jashtëm. Ajo që më shqetëson është kërcënimi nga brenda, tërheqja e Evropës nga disa nga vlerat e saj thelbësore që ndan me SHBA-në,” tha ai.
Kujtojmë, më 23 shkurt në Gjermania do të mbahen zgjedhjet e parakohshme parlamentare. Sondazhet tregojnë se blloku konservator me në krye Friedrich Merz, kandidat për kancelar të ardhshëm, kryeson ndaj partive tjera.
