Administrata e Donald Trump dëshiron kushte të reja për qasjen e SHBA-së në mineralet kryesore dhe burimet energjetike të Ukrainës, por nuk po i ofron Kievit asnjë garanci sigurie në këmbim.
Sipas një projekt-marrëveshjeje dërguar palës ukrainase, të cilën Financial Times e ka parë, SHBA po kërkon krijimin e një bordi mbikëqyrës për të menaxhuar një fond të përbashkët investimi për projektet e shfrytëzimit të naftës, gazit dhe mineraleve të Ukrainës. Të ardhurat nga këto projekte do të ndahen midis Ukrainës dhe SHBA-së.
Sipas propozimit, Uashingtoni do të emërojë tre nga pesë anëtarët e bordit, duke i dhënë të drejtën e vetos së SHBA-së mbi të gjitha vendimet e fondit.
Drafti përcakton se fondi do të zbatohet gjithashtu për projektet e zbatuara nga vetë qeveria ukrainase, por nuk përfshin propozimin e mëparshëm të Trump që SHBA të fitojë një aksion në infrastrukturën bërthamore të Ukrainës.
Në shkurt 2025, Ukraina dhe SHBA arritën një marrëveshje për bashkëpunimin në fushën e mineraleve kryesore. Muajin e kaluar, Volodymyr Zelensky udhëtoi në SHBA për të nënshkruar marrëveshjen, por kjo nuk ndodhi pasi Trump dhe Zelensky patën mosmarrëveshje.
Trump beson se kjo marrëveshje do të ishte një mënyrë e drejtë që SHBA t’i kthejë paratë që i ka dhënë Ukrainës deri më tani përmes ndihmës ushtarake dhe financiare. Zelensky tha sot se SHBA “po ndryshon vazhdimisht kushtet” e marrëveshjes së mineraleve, transmeton KosovaPress.
