Epshi për pushtet shkakton dëme të mëdha. Kam përjetuar tmerrin e luftës. Le të mbrojmë Evropën dhe demokracinë nga sulmet, tha stilisti italian i modës, Giorgio Armani në apelin e tij duke iu referuar luftrave aktuale mes disa vendeve.
Evropian i bindur, pacifist i bindur, Giorgio Armani nënshkruan letrën e tij të apelit dërguar gazetës së përditshme italiane “La Repubblica” në këtë mënyrë:
“Po e shkruaj këtë letër të hapur i bindur se po shpreh një ndjenjë të përbashkët, me shpresën se mesazhi im do të dëgjohet.
Unë jam një qytetar krenar italian dhe një qytetar krenar evropian. Ndjenja e presioneve shkatërruese jo vetëm që më trishton, por edhe më frikëson shumë.
Etja për pushtim, epshi për pushtet mund të shkaktojë vetëm dëme të mëdha. Kam kujtime të pashlyeshme për të, që datojnë që kur isha fëmijë dhe përjetova tmerret e luftës, personalisht.
Në situatën aktuale të brishtë, vlera e Bashkimit Evropian qëndron edhe më shumë në bashkëpunimin, mbështetjen e ndërsjellë dhe harmoninë, pasi të vepruarit si një organ i vetëm nuk e fshin identitetin e shteteve individuale, por përkundrazi e forcon atë.
Retorika e sovranitetit është e ligë, ne mund të mbetemi vetëm të bashkuar.
Dhe e pamë vetëm pak vite më parë, kur gjatë pandemisë të gjithë u ndjemë më pranë, më të bashkuar, duke rizbuluar shumë vlera dhe një dëshirë: për t’u bërë më të mirë.
Pastaj, sikur të kemi harruar gjithçka. Sot, kur tensioni ndërkombëtar mund të shpërthejë lehtësisht në një konflikt më të madh, është urgjente dhe e nevojshme të rivendoset bashkëpunimi dhe të mbrohet demokracia nga çdo sulm.
Apeli im sigurisht që nuk mund të ndalojë vendimet e atyre që krijuan këtë situatë, por shpresoj se mund të na ndihmojë të reflektojmë: pa Evropën jemi të vegjël, jemi të dobët, jemi të ekspozuar ndaj agresionit të atyre që besojnë vetëm në vlerën e pushtimit.
Të mos ndahemi, të qëndrojmë të bashkuar, të mbrojmë parimet demokratike”, thuhet në letrën e stilistit të njohur, Giorgio Armani.
Ai në vitin 1978, prezantoi koleksionin e tij të parë të veshjeve të gatshme për burra për pranverë dhe verë të vitit 1976 me emrin e tij. Ai gjithashtu prodhoi një linjë për femra për të njëjtin sezon. Në vitin 2001, Armani u vlerësua si stilisti më i suksesshëm me origjinë italiane.
