Virginia Giuffre, një nga akuzueset kryesore të Jeffrey Epstein, tha në një postim në Instagram se kishte pësuar një aksident me një autobus shkollor dhe ndodhej në spital.
Ajo ndau një foto nga shtrati i spitalit me fytyrë të mavijosur dhe shkroi se ishte në dështim të veshkave dhe i kishin dhënë katër ditë jetë, shkruan CNN News, transmeton KosovaPress. Megjithatë, autoritetet në Australi minimizuan ashpërsinë e lëndimeve.
Giuffre tha se një autobus shkollor që udhëtonte me 110 km/h goditi makinën e saj, por nuk specifikoi vendin apo kohën e aksidentit. Policia e Australisë Perëndimore raportoi një përplasje të vogël pranë Perth-it më 24 mars, me dëme prej rreth 1,250 dollarësh dhe pa të lënduar.
Një burim konfirmoi se ajo është e shtruar në spital, por nuk është në rrezik për jetën. Ajo ka mavijosjet e dukshme në foto, por nuk ka treguar në spital shkakun e tyre.
Giuffre ishte një nga akuzueset kryesore të Epstein, duke pretenduar se ai e trafikoi dhe e detyroi të kryente marrëdhënie me miqtë e tij, përfshirë Princin Andrew, kur ishte 17 vjeç. Princi e mohoi akuzën, por në 2022 arriti një marrëveshje jashtë gjykate me të për një shumë të pazbuluar.
Epstein u akuzua për trafikim seksual dhe u vetëvra në burg përpara se të përballej me gjyqin.
