Një video e momentit kur një tërmet goditi Mianmarin është bërë virale në mediat sociale.
Tërmeti u ndje në një numër vendesh fqinje, përfshirë Tajlandën. Një kamera vëzhgimi kapi se si dukej ndikimi i tërmetit në çatinë e një hoteli luksoz në Bangkok.
Video tregon një çift të shtrirë të përqafuar në një dyshek të fryrë në një pishinë. Papritur, një tërmet godet dhe valë të mëdha formohen në pishinë dhe uji fillon të derdhet mbi rrokaqiell. Një çift ikën nga pishina në panik.
Të paktën 1.700 njerëz u vranë dhe 3.400 u plagosën nga tërmeti 7.7 ballë sipas Rihterit të premten.
Parashikimet modele nga Shërbimi Gjeologjik i SHBA-së vlerësojnë se numri i të vdekurve mund të kalojë 10.000 dhe humbjet mund të tejkalojnë prodhimin vjetor ekonomik të vendit.
Tërmeti tronditi pjesë të Tajlandës fqinje, ku 17 persona humbën jetën në kryeqytet kur një rrokaqiell u shemb, sipas autoriteteve tajlandeze. Të paktën 78 persona kanë mbetur të bllokuar nën rrënojat e ndërtesës së shembur.
Tërmeti më shkatërrues që ka goditur Mianmarin në 80 vjet ka dëmtuar infrastrukturën kryesore, duke përfshirë aeroportin, autostradat dhe urat, duke ngadalësuar operacionet humanitare, thanë Kombet e Bashkuara.
Tërmeti lëshoi energji ekuivalente me më shumë se 300 shpërthime bomba atomike, tha për CNN gjeologia Jess Phoenix. Ajo paralajmëroi gjithashtu se pasgoditjet mund të vazhdojnë për muaj të tërë.
“Fuqia e lëshuar nga një tërmet si ky është rreth 334 bomba atomike,” tha Phoenix.
Ajo shpjegoi se lëkundjet do të vazhdojnë sepse pllaka tektonike e Indisë vazhdon të zbresë nën pllakën euroaziatike në zonën e Mianmarit, transmeton KosovaPress.
