ZRrE-ja sot vendos për rritjen e tarifave të energjisë elektrike
Biznes
Lexohet për: 3 min.
11 muaj më parë
Linku u kopjua

Bordi i Zyrës së Rregullatorit të Energjisë (ZRrE), në mbledhjen e cila është paraparë të mbahet sot në orën 15:00, pritet të marrë vendim për tarifat e reja të energjisë elektrike.

Bazuar në vendimin që ZRrE-ja ka marrë një javë që shkoi, me të cilin ka miratuar të Hyrat Maksimale të Lejuara për KESCO-n në vlerë prej 400 milionë eurosh, tarifat e energjisë elektrike, nga muaji prill, pritet të shtrenjtohen rreth 15 për qind.

Kryesuesi i ZRrE-së, Ymer Fejzullahu, në mbledhjen e javës së kaluar këtë shtrenjtim të rrymës, e ka arsyetuar me rritjen e çmimit të importit, rregullimet që po bëhen në Termocentralin Kosova B dhe inflacionin, raporton KosovaPress.

Fejzullahu, po ashtu ka theksuar se ngritja e  tarifave të energjisë elektrike do të ndodhë te të gjitha kategoritë e konsumatorëve, përfshirë edhe bizneset.

Në komentet që kishte dorëzuar në ZRrE, Qeveria ka propozuar që tarifat e konsumatorëve të amvisërisë të mbeten të njëjta, e rritja potenciale t’i prekë bizneset, veçmas ato të mëdhatë.

Ndërsa, Zyra e Presidencës ka rekomanduar që të mos rriten tarifat dhe ka propozuar që kostoja shtesë e operatorëve, e diktuar nga importi, të mbulohet përmes pakos prej 75 milionë eurosh, të ndara nga Bashkimi Evropian.

Në mbledhjen e fundit të qeverisë që u mbajt javën e kaluar, kryeministri i Albin Kurti, ka theksuar se janë në pritje të vendimit të ZRrE-së për tarifat e energjisë elektrike.

Edhe KEK-u ka kërkuar që të rritet çmimi i megavatit të energjisë elektrike që ai ia shet KEDS-it dhe KOSTT-it nga 29.5 në 32.5 euro, por që nuk është aprovuar nga ZRrE-ja.

Ndërkaq, sot pas raportimit të Bordit të ZRrE-së në Komisionin për Ekonomi, ky institucion do të mbajë mbledhjen sot pas dite me këtë rend të ditës:

Miratimi i Rendit të Ditës;

2. Miratimi i procesverbalit të mbledhjes së mëparshme;

3. Shqyrtimi i propozimit të tarifave për Shfrytëzimin e Rrjetit të Transmetimit, Operimin e

Sistemit dhe Operimin e Tregut (OST/OT) për vitin relevant tarifor 2023;

4. Shqyrtimi i propozimit të tarifave për Shfrytëzimin e Rrjetit të Shpërndarjes (OSSh) për vitin

relevant tarifor 2023;

5. Shqyrtimi i propozimit të tarifave me pakicë për Furnizuesin me Shërbim Universal (FSHU) për

vitin relevant tarifor 2023;

6. Shqyrtimi i raportit vjetor për vitin 2022.

Kjo webfaqe mirëmbahet dhe menaxhohet nga Agjencia e Lajmeve KosovaPress. KosovaPress mban të drejtat e rezervuara me copyright sipas dispozitave ligjore për të drejtat e autorit dhe pronës intelektuale. Përdorimi, modifikimi dhe shpërndarja për qëllime komerciale pa marrëveshje me KosovaPress, ndalohet rreptësisht.
Ky aplikacion uebsajti është zhvilluar me mbështetjen e #SustainMedia Programme, i bashkëfinancuar nga Bashkimi Evropian dhe Qeveria Gjermane, ndësa implementohet nga GIZ, DW Akademie dhe Internews. Përmbajtja e tij është përgjegjësi vetëm e KosovaPress dhe nuk pasqyron domosdoshmërisht pikëpamjet e BE-së apo të Qeverisë Gjermane.
Të gjitha të drejtat e rezervuara nga A.P.L. KosovaPress © 2002-2024