Zëvendësministri Sallahu i quan prokurorët kriminelë, KPK paralajmëron ndërprerje të bashkëpunimit me MD-në

Zëvendësministri Sallahu i quan prokurorët kriminelë, KPK paralajmëron ndërprerje të bashkëpunimit me MD-në

Këshilli Prokurorial i Kosovës (KPK), thotë se është thellësisht i shqetësuar me deklaratat e zëvendësministrit të Drejtësisë, Blerim Sallahu, të bëra përmes një statusi në “Facebook”, ku i quan prokurorët kriminelë.

KPK thotë se deklaratat e Zëvendësministrit të Drejtësisë janë linçuese, tendencioze, paragjykuese dhe kanë për qëllim dëmtimin e sistemit prokurorial.

 “Nëse pushteti ekzekutiv nuk distancohet nga deklaratat e tilla do të ndërpritet çfarëdo komunikimi dhe bashkëpunimi ndër-institucional”, thuhet në reagim. 

 Ndërkaq, Prokurori i Shtetit siguron opinionin se do t’i ndërmarrë të gjitha veprimet e nevojshme ligjore lidhur me pretendimet e paraqitura sot në media, dhe çfarëdo shkelje eventuale do të këtë reagime ligjore. 


 Këshilli Prokurorial i Kosovës si organ i pavarur kushtetues nuk ka lejuar dhe nuk do të lejojë asnjë interferim nga askush për çfarëdo interesi personal, grupor apo politik të cenojë integritetin e sistemit prokurorial.

Zëvendësministri Blerim Sallahu, përmes një statusi në Facebook, ka thënë se prokurorët janë të involvuar në veprime kriminale.

“Në vend të ndjekjes së kriminelëve, ditëve të fundit, por jo vetëm, po dëshmohet që vet prokurorët janë të involvuar në veprime kriminale. Është nevojë urgjente që kjo situatë të ndryshojë. Përveç mekanizmit të vetingut, janë shumë të rëndësishme edhe ndryshimet ligjore që eliminojnë piramidat kriminale. Siç kemi thënë shteti i së drejtës nuk ka alternativë, prandaj edhe shumë shpejt pritet që këto ndryshime t’i procedohen Kuvendit të Kosovës”, ka shkruar Sallahu në Facebook.

Sot u raportua se ish-prokurori special, Sylë Hoxha, në një marrëveshje gojore me ish-drejtorin e AKI-së, Driton Gashi, kanë përfshirë dy agjentë fiktiv që të dëshmojnë në gjykatë, e që më pas dëshmitë e tyre janë përdorur nga ish-presidenti, Hashim Thaçi, për të akuzuar Albin Kurtin dhe Glauk Konjufcën për lidhje me organizatën e shpallur terroriste “Syri i Popullit”.

Lidhur me këto pretendime të raportuara në media ka reaguar edhe ministrja e Drejtësisë, Albulena Haxhiu, e cila ka kërkuar që ish-prokurori special Sylë Hoxha të thirret në përgjegjësi penale.

Lexo edhe

Video

error: