Të martën është zbuluar shtatorja e heroinës së kombit, Fetnete Ramosaj në Kompleksin Kulturor në Deçan, me ç’rast kryetari i Aleancës për Ardhmërinë e Kosovës (AAK), Ramush Haradinaj, theksoi se Fetnete Ramosaj bëri luftë të dyfishtë, në front dhe si kroniste, duke dëshmuar të vërtetën e luftës së UÇK-së.

"Bashkëluftëtarja Fetnete Ramosaj, përmes veprave të saj siguroi që koha mos ta ndalë kujtesën për luftën tonë të lavdishme. Ajo bëri luftë të dyfishtë, në front dhe si kroniste, duke dëshmuar të vërtetën e luftës së UÇK-së, dhe duke e përjetësuar luftën çlirimtare dhe mbajtjen gjallë idealin e lirisë ndër breza", ka thënë Haradinaj.

Haradinaj ka shtuar se shtatorja i ngritet në nderim të veprës dhe angazhimit jetësor ndaj Atdheut.

"Në nderim të veprës dhe angazhimit jetësor ndaj Atdheut, sot në Deçan, bashkë me kryetarin Bashkim Ramosaj dhe shumë bashkëluftëtarë bëmë zbulimin e shtatores së Heroinës së Kombit, Fetnete Ramosaj.Përjetë falënderues dhe mirënjohës ndaj Heroinës, Fetnete Ramosaj!", është shprehur Haradinaj në Facebook.

Gjatë ditës është mbajtur edhe një tryezë shkencore për jetën dhe veprën e heroinës Fetnete Ramosaj.

Fetnete Ramosaj, që nga viti 1989 ishte pjesëtare aktive e lëvizjes ilegale dhe asaj gjithëpopullore në Kosovë. Ka qenë pjesëmarrëse aktive në luftën çlirimtare, si pjesëtare e Ushtrisë Çlirimtare të Kosovës. Gjatë luftës në Kosovë (1998-1999), veç tjerash, ka kryer detyrën e Zëdhënëses së UÇK-së për Zonën Operative të Dukagjinit. Njëkohësisht ka raportuar edhe për Agjencinë e Lajmeve "KosovaPress", Radio Televizionin Shqiptar (RTSH), etj. Ka bashkëpunuar me agjencitë ndërkombëtare të lajmeve "Zëri i Amerikës", "Deutsche Ëelle", "BBC" dhe me shtypin shqiptar të kohës në Kosovë, Shqipëri e diasporë.