Pranë selive të katër partive politike është zhvilluar aksion simbolik, ku u kërkua që gjatë periudhës zgjedhore të ketë diskurs gjithëpërfshirës. Organizata “Youth Initiative for Human Rights Kosovo” filloi aksionin simbolik nga selia e Lëvizjes Vetëvendosje më pas tek Partia Demokratike e Kosovës, Lidhja Demokratike e Kosovës dhe për të përfunduar pranë selisë së Aleancës për Ardhmërinë e Kosovës. Ky aksion u shoqërua me pankarta të mesazheve të përcjella nga vet partitë për zgjedhjet e 9 shkurtit të vitit të ardhshëm.

Rina Kadiri nga YIHR theksoi kërkesën që kanë për partitë politike në këtë periudhë zgjedhore.

"Të gjithë në Lëvizje, Gjithë për Kosovën", "Gjithë për Kosovën, të lirë nga femicidi" dhe "Gjithë për Kosovën, të lirë nga dhuna", kanë qenë mbishkrimet në pankartat që kanë mbajtur në duar aktivistë para selisë së Lëvizjes Vetëvendosje.

Më pas, ky aksion rrugor ka vazhduar edhe para selisë së Partisë Demokratike të Kosovës.

Edhe pranë kësaj selie, aksioni u shoqërua me pankarta, me mbishkrime si: "Kosova mundet ma mirë veç pa femicid", "Kosova mundet ma mirë veç pa dhunë", "Kosova mundet ma mirë veç pa diskriminim".

Kristian Rrasaj nga YIHR para selisë së Lidhjes Demokratike të Kosovës ftoi kandidatët për deputetë që të reflektojnë mbi rolin e tyre në këtë proces.

Pjesëmarrësit në këtë aksion kanë mbajtur pankarta me mbishkrime "Bëhu ndryshimi, jepi fund diskriminimit", dhe “Lumir 2025 bëhu ndryshimi".

Nga këtu, aktivistët kanë vazhduar aksionin deri tek Aleanca për Ardhmërinë e Kosovës, ku Blendë Pira bëri thirrje për fuqizimin e njerëzve dhe respektimin e dinjitetit të tyre.

"Koalicioni për Kosovën fituese", “Kosova është fituese veç kur s'ka diskriminim", me këto mesazhe pranë selisë së Aleancës për Ardhmërinë e Kosovës ka përfunduar aksioni simbolik i YIHR. Ku nga katër parti politike u kërkua që gjatë fushatës zgjedhore të kenë diskurs gjithëpërfshirës, respektues dhe të mbështetur mbi parimet e të drejtave të njeriut.