Tre turistë të gjetur të vdekur në Meksikë u qëlluan në kokë dhe trupat e tyre u hodhën në një pus, kanë konfirmuar autoritetet.

Zyrtarët besojnë se turistët u sulmuan duke u përpjekur të ndalonin vjedhjen e kamionit të tyre.

Vëllezërit australianë Jake dhe Callum Robinson, 30 dhe 33 vjeç, dhe shoku i tyre amerikan Jack Carter Rhoad, 30 vjeç, u zhdukën më 27 prill ndërsa ishin në një udhëtim në Ensenada.

Të afërmit e tre burrave identifikuan trupat e tyre të dielën pasi udhëtuan në Meksikë për të ndihmuar autoritetet, tha një prokuror i shtetit.

Sulmuesit donin t’ua vidhnin automjetin për gomat e tij dhe qëlluan turistët kur ata rezistuan, sugjeroi prokurorja e shtetit të Baja California, Maria Andrade.

Trupat e tyre u gjetën në një pus të thellë 4 m rreth 6 km nga vendi i sulmit në qytetin e Santo Tomás të premten.

Një trup i katërt u gjet në pus, por kishte qenë atje më gjatë dhe nuk kishte lidhje me rastin, thanë zyrtarët.

Dy burra dhe një grua janë arrestuar nën dyshimin për përfshirje direkte ose indirekte në sulm. Një person me precedentë penalë është akuzuar për “zhdukje me forcë”.

Më herët, FBI tha se po shqyrtonte rastin dhe ishte në kontakt me partnerët ndërkombëtarë.

Në vitin 2022 - viti i fundit për të cilin të dhënat e Departamentit të Shtetit janë plotësisht të disponueshme - 192 amerikanë vdiqën në Meksikë, nga të cilët 46 u konsideruan si vrasje.