Vdes një person në një aksident në Kroaci, raportohet se dy kosovarë janë në gjendje të rëndë
![]()
Në mediat kroate po raportohet se një shtetas i Kosovës është aksidentuar dje në Soline në Kroaci, me një veturë tjetër, shoferi i së cilës ka vdekur.
Ndërsa, raportohet se gjashtë persona të tjera janë lënduar.
Pesë prej tyre kanë pësuar lëndime të rënda fizike, ndërsa një është lënduar lehtë.
Media kroate “Index. hr” ka raportuar se aksidenti është shkaktuar nga 40-vjeçari i Kosovës i cili ishte me veturën me tabela sllovene.
Raportohet se shoferi kosovar doli në korsinë e kundërt dhe përplasi veturën tjetër me targa kroate.
Në veturën kroate ka vdekur shoferi 45 vjeç, ndërsa pasagjerët me të, një grua dhe një burrë – të dy shtetas të Polonisë – kanë lëndime serioze, por janë jashtë rrezikut për jetë.
Në spitalin e Dubrovnikut është edhe shoferi kosovar për shkak se ka pësuar lëndime të rënda. Lëndime kanë pësuar edhe pasagjerët në veturën e tij, po ashtu shtetas të Kosovës. Një grua 42 vjeçe dhe një 11-vjeçar kanë pësuar lëndime të rënda dhe të rrezikshme për jetë. Një 18-vjeçar tjetër raportohet se është liruar nga spitali me lëndime të lehta.
