Këshilli i Mbrojtjes dhe Sigurisë Kombëtare të Ukrainës ka njoftuar se do të ndalojë përdorimin e aplikacionin Telegram, i themeluar nga rusi Pavel Durov, në pajisjet elektronike të biznesit të shumicës së ushtarëve dhe oficerëve të saj, duke dyshuar se shërbimet ruse kanë qasje në mesazhe.

"U mor një vendim për të ndaluar instalimin dhe përdorimin e Telegramit në pajisjet zyrtare të zyrtarëve qeveritarë, personelit ushtarak, punonjësve të sektorit të sigurisë dhe mbrojtjes, si dhe kompanive që menaxhojnë infrastrukturën kritike," tha Këshilli në një deklaratë.

Ushtria "shpesh e përdor atë për të diskutuar çështje operacionale konfidenciale,"  tha një zyrtar i lartë ukrainas i sigurisë, duke folur në kushte anonimiteti.

“Është një burim i madh i rrjedhjeve të informacionit, sepse rusët hakojnë Telegramin shumë lehtë”, shpjegoi ai.

Punonjësit, të cilëve u kërkohet të përdorin Telegramin si pjesë e detyrave të tyre, veçanërisht për shpërndarjen e njoftimeve zyrtare për shtyp, nuk përfshihen nga ky rregull, sqaroi këshilli, pasi aplikacioni është kanali kryesor i komunikimit midis ushtrisë dhe organeve publike.

Ky vendim u mor gjatë një takimi mbi "kërcënimet për sigurinë kombëtare" të paraqitura nga aplikacioni, shton Këshilli, një institucion nën autoritetin e presidencës ukrainase.

Shefi i inteligjencës ushtarake të Ukrainës Kirilo Budanov paraqiti "informacion të vërtetuar" që tregon se shërbimet e inteligjencës ruse "kanë qasje në korrespondencën personale të përdoruesve të Telegram, madje edhe mesazhet e fshira, si dhe informacionin e tyre personal", sipas këshillit.

Përfaqësuesit e shërbimeve të sigurisë ukrainase thonë se Moska po e përdor Telegramin për sulme kibernetike ose gjeolokacionin e përdoruesve.