UEFA me masa të veçanta ndaj tifozëve që hyjnë në fushë
Pushtimet e shpeshta të tifozëve në fushë gjatë evropianit të futbollit në Gjermani e shtynë UEFA-n të marrë masa të rrepta.
Në ndeshjen e së shtunës në Dortmund ndërmjet Portugalisë dhe Turqisë (3:0), shikuesit dolën disa herë në fushë dhe objektivi i selfieve ishte Cristiano Ronaldo.
“Do të merren masa shtesë sigurie në stadiume për të përmbushur më tej kërkesat e turneut dhe për të parandaluar incidente të tilla”, tha UEFA, pa specifikuar ndonjë masë specifike.
“Siguria në stadium, në fushë dhe në ambientet e skuadrës është prioriteti kryesor i UEFA-s, DFB-së gjermane dhe organizatorëve të Kampionatit Evropian”, tha UEFA, duke theksuar pasojat ligjore për ata që hyjnë në fushë pa autorizim.
“Çdo person i paautorizuar që hyn në fushë është një shkelje e rregullave të stadiumit dhe do të rezultojë me përjashtim nga stadiumi, ndalim nga të gjitha ndeshjet e evropianit dhe akuza penale për hyrjen në fushë”.
