Tifozët e Juventusit i kërkuan Matias Soulés që të qëndrojë në Torino përtej verës, kur argjentinasi mbërriti për të filluar përgatitjet para-sezonale me “Zonjën e Vjetër”.

Talenti argjentinas, Soulé është synimi i shumë skuadrave të Premier Ligës, ndër to Leicester Cityt dhe sipas “Sky Sport Italia”, “Dhelprat” janë gati të paraqesin një ofertë prej 25 milionë eurosh, raporton KosovaPress.

Megjithatë, një grup tifozësh të Juventusit i kërkuan 21-vjeçarit të qëndronte në Torino në sezonin 2024/2025, kur ai mbërriti për kontrolle mjekësore para-sezonale në J Medical të mërkurën në mëngjes.

Disa burime në Itali pohojnë se trajneri i ri i Juventusit, Thiago Motta, dëshiron ta testojë argjentinasin në stërvitje përpara se të vendosë nëse do ta mbajë apo ta shesë atë.

Në të njëjtën kohë, Juventusi duhet të rrisë buxhetin dhe të balancojë rezervat, kështu që një ofertë prej 40 milionë eurosh do t'i bindte Bianconerët të shesin ish-yllin e Frosinones.

Soulé e kaloi sezonin e fundit në huazim në “Stadio Stirpe”, duke shënuar 11 gola në 36 ndeshje të Serie A, të cilat, megjithatë, nuk ishin të mjaftueshme për të ndihmuar Frosinonen të shmangte rënien në Serie B.