SHSKUK kërkon të merren masa ndaj logopedit që keqtrajtoi një paciente 5-vjeçe

SHSKUK kërkon të merren masa ndaj logopedit që keqtrajtoi një paciente 5-vjeçe

Shërbimi Spitalor Klinik Universitar i Kosovës (SHSKUK), ka reaguar pas raportimeve se një logopedi nga Gjilani kishte keqtrajtuar një vajzë 5-vjeçare e diagnostikuar me autizëm, duke thënë se rasti ka ndodhur jashtë institucionit të QKUK-së.

Në reagimin në Facebook, SHSKUK thotë se menaxhmenti i SHSKUK-së ka kërkuar nga drejtori i Klinikës së Otorinolarongologjisë që të procedojë me ndërmarrjen e masave konform legjislacionit në fuqi, pasi që drejtori i klinikës është mbikëqyrës i shefave të reparteve dhe shërbimeve përkatëse.


“Për SHSKUK-në është e dënueshme dhe e papranueshme sjellja e tillë e një profesionisti shëndetësor, andaj siç e theksuam presim që drejtori i Klinikës së ORL-së të ndërmarrë masat e nevojshme konform legjislacionit në fuqi”, thuhet në reagim.

Sa i përket asaj se ordinanca ku ndodhi keqtrajtimi nuk ka pasur licencë, SHKSUK thotë se lëshimi i licencës është në kompetencë të Odave përkatëse, Odës së Mjekëve për mjekë dhe Odës së Infermierëve për profilet tjera, për çka të njëjtit duhet të lajmërojnë institucionet.

“Mungesa e një data-baze elektronike për stafin e SHSKUK-së e vështirëson përcjelljen në kohë reale të punës, avancimeve dhe mungesave eventuale të stafit.  Për këtë arsye, menaxhmenti i SHSKUK-së para dy jave ka filluar procesin e digjitalizimit të të dhënave të stafit të saj”, përfundon reagimi i SHSKUK-së. 

Lexo edhe

Video