Në Shqipëri, edhe seanca e sotme e parlamentit u shoqërua me tensione jashtë dhe brenda sallës.
Deputetët e opozitës, të cilët erdhën në grup drejt godinës ku zhvillohen seancat, gjetën në hyrje, një gardh me barriera metalike, pas të cilave qëndronin, në numër të shtuar, forcat e Gardës së Republikës.Përpjekjet e përsëritura për të çarë kordonin e punonjësve të sigurisë, çuan në përplasje të herë pas hershme mes palëve. Një parullë e madhe e bardhë, me mbishkrimin me shkronja të zeza “Edi Rama mafia”, u vendos më pas nga përfaqësuesit e opozitës, mbi barrierat metalike.
Edhe në sallën e parlamentit, deputetët e paktë të opozitës që mundën të hynin, u përpoqën të pengonin zhvillimin normal të seancës. Ata protestuan për praninë e lartë në numër të punonjësve të Gardës, dhe kontrollet që ata kishin ushtruar ndaj tyre, duke akuzuar drejtuesen e parlamentit se e ka kthyer "institucionin më të rëndësishëm të vendit, në një burg të sigurisë së lartë”. Ata thanë se dhe deputetë ndaj të cilëve nuk kishte masë përjashtimi, nuk po lejoheshin të hynin në sallë.Ndërsa parlamenti, i mbylli punimet në një kohë të shkurtër, tensionet u rikthyen, kur protestuesit e mbledhur si çdo javë para Bashkisë së Tiranës, u shfaqën para parlamentit.
Deputetët e opozitës të bashkuar me ta, u përplasën me njësitë speciale, duke kundërshtuar praninë e tyre “në shkelje të ligjit” në mjediset e parlamentit, institucion i cili është nën mbikëqyrjen e Gardës.
Policia mohoi më vonë kategorikisht, akuzat për praninë e armëve nga ndonjë punonjës i saj, duke saktësuar se ligji ndalon që policia të jetë e armatosur gjatë tubimeve. /Voa