Punëtoret teknike të Kuvendit të Kosovës, të cilët kanë mbajtur grevë për tre muaj me kërkesën për rritjen e pagave dhe kushte më të mira pune, janë përballur me zëvendësim të menjëhershëm nga punëdhënësi.

Po ashtu gjërat e tyre personale janë larguar nga vendi i punës dhe janë hedhur në qese të zeza para dyerve të Kuvendit. Ndërsa, punëtoreve greviste nuk u lejohet as hyrja në oborrin e objektit.

Njëra nga punëtoret teknike, Nebahate Krasniqi, ka thënë për KosovaPress se kompania e pastrimit “Schafberger”, nuk i ka informuar ende punëtorët e tij se a do u vazhdohet kontrata e punës, duke shtuar se nuk po u lejohet as në oborr të Kuvendit të qëndrojnë.  

Punëtorja tjetër Shefkije Canolli është shprehur se shkeljet ndaj tyre kanë arritur kulmin, sipas saj  duke u “hedhë jashtë si një leckë”.

Ndërsa, kryetari i Sindikatës së Pavarur të Sektorit Privat të Kosovës (SPSPK), Jusuf Azemi ka theksuar se sipas ligjit të punës dhe Inspektoratit Qendror të Punës, kompania ka bërë shkelje ligjore dhe padrejtësia.

Punëtoret teknike të Kuvendit të Kosovës kanë kërkuar tash e tre muaj që të rriten pagat nga 275 euro në 550 euro.