Zëvendëskryeministri dhe ministri i Brendshëm i Serbisë Ivica Daçiq ka bërë të ditur se autoritetet serbe kanë arrestuar të shtunën Tefik Mustafën në pikën kufitare Merdare, nën dyshimet për “krime lufte”.

Ministria e Punëve të Brendshme e Serbisë thotë se Mustafa, “si pjesëtar i UÇK-së, në deklaratat e dëshmitarëve përmendej si pjesëmarrës në rrëmbimin e policëve Goran Marinkoviq, Zhivojin Paviq dhe Predrag Millosheviq, më 19 qershor 1999 në rrugën Prishtinë - Gjilan, të cilëve u humbën të gjitha gjurmët”.

Daçiq tha se “personi do të dorëzohet në Prokurorinë për Krime Lufte”, sipas mediave serbe.

KosovaPress ka kontaktuar Policinë e Kosovës dhe Ministrinë e Jashtme të Kosovës në lidhje me arrestimin e raportuar.