Qeveria i hap rrugë zhbllokimit të mjeteve vetanake të komunave
Lajme
Lexohet për: 2 min.
10 muaj më parë
Linku u kopjua
Qeveria e Kosovës miratoi Projektligjin për fondin sovran, si dhe formoi grupin punues për themelimin e muzeut për dokumentimin dhe prezantimin e krimeve të ish-Jugosllavisë dhe Serbisë ndaj shqiptarëve të Kosovës. Po ashtu, ekzekutivi bëri plotësim-ndryshimin e Ligjit për Buxhetin, me çka i hap rrugë zhbllokimit të të hyrave vetanake të komunave, të mbetura përgjatë viteve të kaluara.
Në mbledhjen e Qeverisë, kryeministri Albin Kurti tha se përmes miratimit të Projektligjit për fondin sovran po e forcojnë shtetin dhe zhvillimin ekonomik në vend.
Në anën tjetër, ministri i Kulturës, Rinisë dhe Sportit, Hajrulla Çeku, tha se themelimi i grupit punues për dokumentimin dhe prezantimin e krimeve serbe në Kosovë është një prej nismave kryesore të qeverisë për të adresuar të kaluarën.
Mirëpo për këtë vendim votoi kundër ministri për Komunitete dhe Kthim, Nenad Rashiq, i cili tha se kategorizimi në këtë dokument nuk ka qenë i duhuri, pasi sipas tij ka përgjithësime se i tërë populli serb ka kryer krime në Kosovë.
Ndërkaq, ministri i Financave, Punës dhe Transfereve, Hekuran Murati, tregoi shumën që do të zhbllokohet për komunat me rastin e plotësim-ndryshimit të Ligjit për Buxhetin.
“Deri tani janë bartur ose janë në proces të bartjes të hyrat vetanake nga viti 2022 në vlerë rreth 53 milionë euro, ndërsa me korrigjimin e kësaj dispozite mundësohet bartja edhe 37 milionë eurove të tjera”, tha ai.