Partia Shqiptare Demokristiane e Kosovës i ka dënuar sjelljet e dhunshme të protestuesve në veri të vendit, ndërsa nga Qeveria ka kërkuar koordinim me aleatët ndërkombëtar. Kryetari i PShDK-së, Zef Morina, ka folur në një konferencë për media ku edhe ka bërë të ditur riorganizimin e degës në Prishtinë. Aty, Arbër Prenaj ka marrë drejtimin e kësaj dege.

Morina ka thënë se grupet kriminale serbe janë duke i keqpërdorur qytetarët serb në veri të vendit.

“Ne i dënojmë ashpër sjelljet e grupeve kriminale të veriut të Kosovës të komunitetit serb të cilët janë duke i keqpërdorur qytetarët serb të veriut”, ka thënë ai.

Ai ka kërkuar që institucionet e Kosovës të jenë në koordinim me aleatët, lidhur me veprimet që ndërmarrin.

“Kërkojmë nga Qeveria të mos shikojë interesat partiake dhe të bëjë veprime të pamatura duke mos i koordinuar veprimet e tyre me amerikanët, evropianët dhe miqtë tanë. Këtë po e them, ndoshta tingëllon keq, por po shihen veprimin të cilat kanë ardhur pas ngjarjeve, nga miqtë tanë, na jep me kuptu që nuk janë mirë të koordinuara”, ka thënë ai.

Ndërsa Arbër Prenaj, kryetar i zgjedhur i degës së PShDK-së në Prishtinë, ka thënë se përpara kanë sfida të mëdha.

“Rifillimi i aktiviteteve politike në Prishtinë është vetëm rinisja e një rrugëtimi të gjatë dhe të shkëlqyer drejt ndryshimit pozitiv. Kemi përpara sfida të mëdha, por besoj që së bashku, si një forcë e bashkuar do të arrijmë të bëjmë ndryshime të rëndësishme", ka thënë ai.

E nënkryetari i PShDK-së, Anton Shala, ka thënë se kjo parti ka bërë shumë për vendin andaj sipas tij duhet të ketë një zë aktiv e të fuqishëm në skenën politike.

“Uroj që kjo degë që ka vepruar në kryeqendrën tonë pra në Prishtinë, të jetë një degë aktive, një degë e fuqishme, uroj që edhe ju si aktivistë por edhe të tjerët, të tregojnë një qytetari aktive sepse zhvillimet e përgjithshme në vend nuk janë edhe aq të lehta", ka thënë ai.

Partia Shqiptare Demokristiane do të mbajë konventën e partisë rreth datave 15 deri më 20 qershor.