Policia e Kosovës ka dhënë detaje shtesë mbi operacionin e sotëm në veri të vendit.

Përveç armatimit, pjesëtarët e policisë kanë gjetur dhe konfiskuar edhe kartela grafike (Riga) për prodhimin e kripto-valutave, SIM kartela, telefona, 4 mbushës për radio lidhje, dritë rotative për veturë, si dhe 10 copë USB.

Më herët për KosovaPress, shefi i operativës së policisë për rajonin e veriut Petrit Fejza konfirmoi kapjen e katër granatave M-79, tetë gaz-maskave, pajisje optike dhe pelerinë për snajper, mbi 100 fishekë të kalibrave të ndryshëm, bluza me mbishkrimin  "Kalorësit e Kosovës" në alfabetin cirilik, shufër metalike, busulla e pranga.

Ky armatim është gjetur në një shtëpi dhe në një objekt përcjellës të saj në veri të Mitrovicës. Në lidhje me rastin është arrestuar M. B. (37), i cili është ndaluar për 48 orë.