Paralajmërim për sëmundje ndërsa rritet bilanci i viktimave nga përmbytjet në Pakistan

Paralajmërim për sëmundje ndërsa rritet bilanci i viktimave nga përmbytjet në Pakistan

Punonjësit e ndihmës paralajmërojnë se mungesa e pijes së pastër po shkakton një rritje të sëmundjeve në Pakistan, pasi numri i të vdekurve nga përmbytjet shkatërruese kalon 1200.

Qasja në ujë të pastër ishte problemi më i madh për ata që përpiqeshin të gjenin ushqim dhe strehim, tha organizata bamirëse mjekësore, Mjekët pa Kufij.

Qeveria u mblodh të shtunën për të vlerësuar shkallën e përmbytjeve që kanë zhytur një të tretën e vendit. Të paktën një në tre nga viktimat e përmbytjeve thuhet se janë fëmijë.

Ministri i qeverisë Ahsan Ikbal tha se vendi nuk ka burime për t’u marrë me krizën e paprecedentë.

“Përmbytjet ishin fatkeqësia më e keqe e shkaktuar nga klima në historinë e fundit botërore”, tha ai.

Rreth 1.4 milion shtëpi u shkatërruan nga shirat rekord të munsonit që kanë prekur më shumë se 33 milionë njerëz.

Zyrtari më i lartë i menaxhimit të fatkeqësive të vendit tha se viti 2022 kishte sjellë disa realitete të ashpra të ndryshimit të klimës për Pakistanin.


“Këtë vit nuk dëshmuam një sezon pranvere – u përballëm me katër valë të nxehtit që shkaktuan zjarre në shkallë të gjerë pyjore në të gjithë vendin,” tha Akhtar Nawaz.

Ndërkohë, agjencia e OKB-së për fëmijë UNICEF ​​tha se më shumë fëmijë rrezikoheshin të vdisnin nga sëmundjet në Pakistan për shkak të mungesës së ujit të pastër.

“Tani ekziston një rrezik i lartë i përhapjes së shpejtë të sëmundjeve vdekjeprurëse të shkaktuara nga uji, diarre, kolera, dengoja, malaria. Prandaj ekziston rreziku i shumë më tepër fëmijëve të vdekur,” tha Abdullah Fadil nga UNICEF.

Vlerësimet sugjerojnë se përmbytjet kanë shkaktuar të paktën 10 miliardë dollarë dëme në Pakistan dhe shumë njerëz përballen me mungesa serioze ushqimore. Gati gjysma e të korrave të vendit janë shkatërruar.

Vendi po vuante tashmë nga një krizë ekonomike. Pakistani prodhon më pak se një për qind të emetimeve globale të gazeve serrë, por gjeografia e tij e bën atë jashtëzakonisht të prekshëm ndaj ndryshimeve klimatike.

Shumë faktorë kontribuojnë në përmbytjet, por një atmosferë ngrohëse e shkaktuar nga ndryshimet klimatike i bën më të mundshme reshjet ekstreme.

Bota tashmë është ngrohur me rreth 1.2C që nga fillimi i epokës industriale dhe temperaturat do të vazhdojnë të rriten nëse qeveritë në mbarë botën nuk bëjnë shkurtime të mëdha të emetimeve.

Lexo edhe

Video