Presidentja e Kosovës, Vjosa Osmani, ka udhëtuar për vizitë zyrtare në Teksas të SHBA-së ku do të merr pjesë në Samitin SHBA-Afrikë, me ftesë të Qeverisë amerikane, përkatësisht agjencisë qeveritare Korporata e Sfidave të Mijëvjeçarit- MCC. Ajo gjatë këtij samiti do të mbajë fjalim, si dhe pritet të zhvillojë takime me homologë nga disa vende afrikane. Osmani do të zhvillojë takim edhe me krerët e shtetit të Teksasit, zyrtarë të tjerë të lartë të këtij shteti, zyrtarë të lartë shtetërorë të institucioneve amerikane dhe përfaqësues të Kongresit amerikan. Në agjendë është edhe adresimi në ceremoninë për nder të 20-vjetorit të aktivitetit të MCC-së, me ç’rast presidentja do të shprehë mirënjohje për kontributin e kësaj organizate për zhvillimin ekonomik të Kosovës sikurse është Programi Kompakt në vlerë 236 milionë dollarë, lansimi i të cilit u bë ditë më parë.
Osmani do të mirëpritet edhe nga Garda Kombëtare e Teksasit. Në agjendë do të ketë edhe një ligjëratë në World Affairs Council, në të cilin do të realizojë një bashkëbisedë për Kosovën dhe rrugëtimin e saj drejt integrimit në institucione dhe organizata ndërkombëtare. Në programin e vizitës janë paraparë edhe vizita në disa qytete të Teksasit. Gjatë qëndrimit në Teksas, Osmani shoqërohet nga një delegacion i bizneseve i udhëhequr nga Oda Ekonomike Amerikane, të cilat do ta mbajnë një tryezë të përbashkët me bizneset amerikane për bashkëpunimin reciprok, por edhe takime të tjera me zyrtarë amerikane në ekonomi dhe tregti. Osmani në Teksas do të takohet edhe me mërgatën shqiptare në Qendrën Kulturore Shqiptaro-Amerikane.