Për më shumë se tri orë ministri i Shëndetësisë Arben Vitia ka raportuar para Komisionit për Shëndetësi dhe Mirëqenie Sociale. Teksa para anëtarëve të këtij Komisioni prezantoi punët që janë bërë në këtë sektor, Vitia u ballafaqua edhe me akuza nga opozita.

Duke elaboruar hapat që kanë ndërmarrë në sektorin e shëndetësisë, ministri Vita tha se ligji për unifikimin e barnave është drejt zbatimit.

Deputeti i LDK-së, Armend Zemaj u shpreh se sot temë diskutimi në këtë Komision do të duhej të ishte reforma gjithëpërfshirëse, por sipas tij ende nuk ka ligj për shëndetësi, e madje edhe shumica e ligjeve janë vetëm në debatet e brendshme por jo edhe në Kuvend.

Sa i takon ligjit për sigurime shëndetësore, Zemaj e konsideroi si një ligj me shumë defekte dhe i përgatitur për fushatë zgjedhore. Ai tha se ministri Vitia nuk përmendi asgjë gjatë raportimit të tij mbi Sistemin Informativ Shëndetësor.

Akuzat e Zemajt i hodhi poshtë ministri Vitia, duke thënë se asnjë këshilltar i tij nuk është i përfshirë në kompani farmaceutike.  Sa i takon ligjit për sigurime shëndetësore, Vitia tha se kanë bërë ndryshime drastike.

Ndërsa, për Spitalin e Ferizajt ministri Vitia tha se të gjitha shkeljet që i kanë evidentuar te ky projekt tashmë i kanë adresuar në Prokurorinë e Shtetit dhe tani është në dorën e drejtësisë kjo çështje.

Kritika e akuza të shumta karshi qeverisjes me shëndetësinë pati edhe deputeti nga radhët e PDK-së, Bekim Haxhiu.

Sipas tij, kjo ministri për katër vjet nuk ka arritur ta hartojë një strategji sektoriale për shëndetësi, ndërsa theksoi se janë bërë abuzime e keqpërdorime me barna, e zhvatje milionëshe në blerje të aparaturave dhe rinovimeve të klinikave.

Sa i takon investimeve në klinikat e QKUK-së sipas deputetit të PDK-së janë bërë zhvatje të buxhetit me çmime abuzive deri në 3200% më shtrenjtë.

Para deputetëve, ministri Vitia theksoi se mafia farmaceutike për të cilët po hedhin dyshime opozita ato si kompani janë etabluar gjatë qeverisjeve të kaluara.

Lidhur me hartimin e strategjisë sektoriale për shëndetësi, Vitia tha se nuk do të bëjë strategji për ta vendosur në raftet e MSH-së ashtu siç ka ndodhur me strategjitë e bëra nga ministrat e kaluar.

Ndërsa, për të gjitha akuzat sidomos për akuzat për abuzim me barna e me blerjet e aparaturës dhe kontratat për rinovime ministri i Shëndetësisë, Arben Vitia ftoi Prokurorinë e Shtetit të merret me këto akuza. /B.Ibishi/

Lajmi i plotë në sistemin me parapagim.