Organizata Botërore e Shëndetësisë (OBSH) shpalli të premten vaksinën MVA-BN si vaksinën e parë kundër mpox që i shtohet listës së parakualifikimit.
Agjencia e OKB-së tha në një deklaratë se miratimi i parakualifikimit pritet të lehtësojë qasjen në kohë dhe në rritje në këtë produkt në komunitetet me nevojë urgjente, për të reduktuar transmetimin dhe për të ndihmuar në frenimin e shpërthimit.
"Ky parakualifikim i parë i një vaksine kundër mpox është një hap i rëndësishëm në luftën tonë kundër sëmundjes, si në kontekstin e shpërthimeve aktuale në Afrikë, ashtu edhe në të ardhmen", tha Drejtori i Përgjithshëm i OBSH-së Tedros Adhanom Ghebreyesus.
"Tani kemi nevojë për një rritje urgjente në prokurime, donacione dhe shpërndarje për të siguruar qasje të barabartë në vaksinat aty ku ato nevojiten më shumë, krahas mjeteve të tjera të shëndetit publik, për të parandaluar infeksionet, për të ndaluar transmetimin dhe për të shpëtuar jetë", tha Tedros.Lidhur me kushtet e ruajtjes, ai tha se pas ruajtjes paraprake në ftohtë, vaksina mund të mbahet në 2-8°C deri në tetë javë.
Yukiko Nakatani, ndihmës drejtoreshë e përgjithshme e OBSH-së për qasjen në barna dhe produkte shëndetësore, tha se ky parakualifikim i vaksinës MVA-BN "do të ndihmojë në përshpejtimin e prokurimit të vazhdueshëm të vaksinave mpox nga qeveritë dhe agjencitë ndërkombëtare si Gavi (aleanca e vaksinave) dhe UNICEF për të ndihmuar komunitetet në vijën e parë të emergjencës së vazhdueshme në Afrikë dhe më gjerë."
