Nju Jorku ka shpallur gjendjen e jashtëzakonshme pasi stuhitë e forta sollën përmbytje të shpejta. Shumë prej sistemeve të metrosë, rrugëve dhe autostradave të qytetit janë përmbytur, ndërsa të paktën një terminal në aeroportin LaGuardia u mbyll të premten përpara se të rihapet më vonë.
Deri në 20 cm shi ra në disa pjesë të qytetit, por qielli ishte qetësuar pak nga mbrëmja.
“Kjo është një stuhi e rrezikshme, kërcënuese për jetën,” tha guvernatorja Kathy Hochul. “Unë po shpall një gjendje të jashtëzakonshme në të gjithë qytetin e Nju Jorkut, Long Island dhe Luginën Hudson për shkak të reshjeve ekstreme që po shohim në të gjithë rajonin,” shkroi guvernatorja Hochul në X, i njohur më parë si Twitter.
Ajo u bëri thirrje njerëzve të ndërmarrin hapa për të qëndruar të sigurt dhe “të mos përpiqen kurrë të udhëtojnë në rrugët e përmbytura”. Nuk është raportuar për vdekje apo lëndime.
Gjendja e jashtëzakonshme u shpall gjithashtu në qytetin Hoboken të Nju Xhersit, pikërisht përtej lumit Hudson nga qyteti i Nju Jorkut.
Në qytetin e Nju Jorkut, kryebashkiaku Eric Adams, paralajmëroi njerëzit se ishte koha për “vigjilencë të shtuar dhe kujdes ekstrem” pasi u vendos gjendja e jashtëzakonshme.
“Disa nga metrotë tona janë të përmbytura dhe është jashtëzakonisht e vështirë të lëvizësh nëpër qytet”, tha ai në një konferencë për shtyp. Pavarësisht nga ulja e reshjeve të shiut më vonë të premten, guvernatorja Hochul paralajmëroi “ne jemi ende në vështirësi”.
“Shqetësimi im më i madh tani është se njerëzit do të shohin një ulje të reshjeve të shiut dhe njerëzit do të dalin me automjetet e tyre,” tha ajo për CNN.
Përmbytjet shkaktuan ndërprerje të mëdha në sistemin e metrosë së Nju Jorkut dhe në shërbimin hekurudhor të udhëtarëve Metro North, sipas Agjencisë së Transportit Metropolitan. Disa linja metroje u pezulluan plotësisht dhe shumë stacione u mbyllën.
