Nis operacioni tregtar i interkonjeksionit të gazit Greqi-Bullgari

Nis operacioni tregtar i interkonjeksionit të gazit Greqi-Bullgari

Operacioni tregtar i interkonjeksionit të gazit Greqi-Bullgari (IGB) u nis me një ceremoni në Sofje të shtunën.

Presidentja e KE-së Ursula von der Leyen e quajti IGB-në “një ndryshim të lojës” dhe “një epokë të re për Bullgarinë dhe Evropën Juglindore”.

“Është një ndryshim i lojës për Bullgarinë dhe për sigurinë energjetike të Evropës. Dhe kjo do të thotë liri. Do të thotë liri nga varësia nga gazi rus”, tha ajo.

Presidenti bullgar Rumen Radev tha në fjalën e tij se IGB po ndryshon me vendosmëri hartën energjetike evropiane.

“Më në fund, ne kemi një rrjedhë të vërtetë gazi nga Azerbajxhani.” Ky projekt është i rëndësishëm për shumë vende, tha ai, duke shtuar se “me nisjen e pritur të terminalit LNG në Aleksandropolis, rajoni do të marrë mundësitë e shumëpritura për diversifikim real”.


Në këtë ngjarje morën pjesë edhe presidenti i Azerbajxhanit Ilham Aliyev, Maqedonisë së Veriut Stevo Pendarovski, Serbisë Aleksandar Vuçiq, kryeministri i Greqisë Kyriakos Mitsotakis, ai i Rumanisë Nicolae Ciuca, kryeministri i Bullgarisë Galab Donev, komisionari Evropian për Energjinë Kadri Simson, si dhe kryeshefat ekzekutiv të kompanisë së projektit ICGB, Teodora Georgieva dhe George Satlas.

Interkonektori është i një rëndësie strategjike për Evropën Juglindore dhe ofron një mundësi për diversifikimin e vërtetë energjetik të furnizuesve të gazit natyror në rajon. Ai i siguron Bullgarisë qasje të drejtpërdrejtë në Korridorin Jugor të Gazit dhe furnizimet me gaz natyror nëpërmjet Gazsjellësit Trans Adriatik (TAP), Gazsjellësit Trans Anatolian të Gazit Natyror (TANAP) dhe nga terminali i gazit natyror të lëngshëm pranë Aleksandoupolis në të ardhmen e afërt.

Tubacioni IGB është 182 km i gjatë, nga të cilët 151 km janë në Bullgari dhe 31 km në Greqi. Ai shkon nga Komotini (Greqia Verilindore) nëpërmjet Kurdjali, Haskovo dhe Dimitrovgrad në Stara Zagora (Bullgaria Juglindore).

interkonjeksioni është pjesë e korridorit vertikal të gazit që lidh Greqinë, Bullgarinë, Rumaninë dhe Hungarinë, i cili siguron qasje në gazin natyror dhe gazin e lëngshëm natyror nga Korridori Jugor i Gazit në Evropën Juglindore dhe Qendrore dhe Ukrainën.

Kostoja totale e gazsjellësit tejkalon 240 milionë euro, nga të cilat 45 milionë euro grant nga Komisioni Evropian në vitin 2010 dhe 35 milionë euro të tjera u siguruan në kuadër të një programi operacional. Kredia e Bankës Evropiane të Investimeve e financoi projektin me 110 milionë euro./BTA

Lexo edhe

Video