Kryeministrja e Italisë Giorgia Meloni ka bërë një vizitë të papritur në Florida për t'u takuar me presidentin e zgjedhur Donald Trump të shtunën mbrëma.

Meloni në një postim sot në X, ka falënderuar Trump për mikpritjen duke thënë se “Italia dhe SHBA janë gati për të punuar së bashku”, duke mos dhënë më shumë detaje.

Por, zëvendëskryeministri Matteo Salvini tha se në takim është diskutuar mbi një sërë çështjesh, përfshirë gjendjen e gazetares së arrestuar italiane muajin e kaluar në Iran.

"Të lumtë Giorgia Meloni që takove Donald Trump për të folur për paqen, bashkëpunimin në industri dhe tregti, sigurinë dhe lirimin e Cecilia Salas," shkroi  Salvini në X.

Meloni u prit me duartrokitje në Mar-a-Lago, pas një prezantimi të saj nga Trump, sipas videove të shpërndara në mediat sociale.

Vizita e Melonit vjen disa ditë përpara se ajo të takohet me presidentin amerikan Joe Biden gjatë një vizite në Romë nga 9-12 janar.