Shefja e Grupit Parlamentar të Lëvizjes Vetëvendosje, Mimoza Kusari Lila tha se raporti i Departamentit Amerikan të Shtetit ka lëshime dhe disa pasaktësi. Sipas saj, raporti ndër vite ka treguar për probleme të funksionimit të drejtësisë. Në seancë plenare, ajo krahasoi përmbajtjet e raporteve të mëparme dhe për vitin e kaluar, ku tha se pushteti ka probleme të trashëguara.

Shefja e Grupit Parlamentar të Lëvizjes Vetëvendosje, Mimoza Kusari Lila deklaroi se raporti i vitit 2023, flet për korrupsionin në qeveri bazuar në numrin e madh të kallëzimeve penale por jo për ngritje të aktakuzave. 

Më tej, ajo tha se ky raport ndër vite ka pasur përmbajtje të cilat kanë treguar probleme të funksionimit të drejtësisë. Ajo shtoi se në raportin për vitin 2023, thuhet se qeveria ndërmori hapa të besueshëm për të hetuar e ndjekur penalisht zyrtarët që mund të kenë kryer abuzime të të drejtave të njeriut. Po ashtu, Kusari-Lila theksoi se institucioni i Avokatit të Popullit nga 136 ankesa sa ka marrë më parë, tashmë ka rënë në 40 për keqtrajtim nga Policia.

Sa i përket lirisë së fjalës dhe mediave, shefja e shumicës parlamentare shtoi se në raportin e fundit nuk përmendet fakti se gazetarët nuk lejohen nga pronarët e mediave që të raportojnë për korrupsionin e qeverisë. Shefja e deputetëve të Vetëvendosjes tha se raporti ka lëshime dhe pasaktësi për numrin e grave të pozita udhëheqëse.