Kryeministri Albin Kurti sot ka zhvilluar një takim me bashkatdhetarët në Munih me të cilët ka biseduar mbi zhvillimet aktuale dhe rolin e mërgatës në fuqizimin e lidhjeve ndërmjet Kosovës dhe Gjermanisë.

Duke folur për mërgatën dhe rolin e saj, Kurti tha se ajo është një faktor i cili ka ndihmuar Kosovën në vazhdimësi.

“Brezi i të rinjve e të rejave që po edukohet këtu duhet ta shohë se ka dy mundësi për të jetuar e krijuar. Ky brez mund të jetë ai që fiton dijen gjermane në atdheun e vet dhe e fton dijen gjermane në atdheun e vet. Ne, me institucionet, ju kthejmë borxhin, dhe ju i tregoni shoqërisë e shtetit gjerman një vend të ri prodhimi, që prodhon edhe të mira edhe dije. Ne jemi për një Republikë të fuqishme dhe për një shoqëri të hapur. Si të tillë ne mund ta rrisim vendin tonë dhe shkojmë të qetë në çdo dialog të jashtëm nga i cili veçse fitojmë e përfitojmë për popullin tonë”, tha ai.

Kryeministri Kurti i ka njoftuar bashkatdhetarët në Gjermani me të arriturat në tri vjetët e fundit, duke potencuar se papunësia e përgjithshme në Kosovë ka rënë nga 25.8% në 10.7%, teksa vendet e punës janë shtuar nga 350 mijë në 425 mijë.

Ai po ashtu tha se bruto produkti vendor ka shënuar rritje 33 për qind, ndërsa buxheti i shtetit 35 për qind. Po ashtu, ai përmendi punën e qeverisë në luftimin e krimit dhe korrupsionit, si dhe përmirësimin në sistemin shëndetësor.