Kurti: Ne jemi të përkushtuar të jemi eksportues të sigurisë rajonale dhe ndërkombëtare

Kurti: Ne jemi të përkushtuar të jemi eksportues të sigurisë rajonale dhe ndërkombëtare

I pari i Qeverisë së Kosovës, Albin Kurti në hapjen e konferencës “FSK dhe partnerët”, tha se “Vizioni ynë për Republikën e Kosovës është një vend që promovon stabilitet dhe siguri; jo vetëm për qytetarët e saj, por edhe për rajonin dhe më gjerë”.

Ai ka thënë se Kosova është e përkushtuar që të jetë eksportues i sigurisë rajonale dhe ndërkombëtare, ku ka theksuar edhe se siguria kombëtare e Kosovës ndërthuret me sigurinë rajonale dhe atë më të gjerë euroatlantike.

Kurti në këtë konferencë tha edhe se “Kosova synon të jetë pjesë përbërëse e strukturave rajonale dhe globale të sigurisë; në veçanti NATO dhe BE. Po ashtu dëshiron të jetë pjesë e nismave rajonale dhe të promovojë marrëdhënie paqësore fqinjësore në mënyrë që të rrisë stabilitetin dhe besimin ndërmjet vendeve në rajon. Republika e Kosovës, merr seriozisht përgjegjësinë e saj kryesore për t’u ofruar siguri qytetarëve të saj”.

Kryeministri Kurti shprehu mirënjohjen e thellë për rolin e rëndësishëm që NATO, përmes KFOR -it, ka luajtur në zhvillimin e sektorit tonë të sigurisë dhe në ruajtjen e një mjedisi të sigurt në Kosovë.

“Është kënaqësi e madhe të ju drejtohem sot në këtë konferencë, ‘FSK dhe partnerët’. Do të doja të filloja duke u falënderuar juve dhe vendeve tuaja për të gjithë mbështetjen dhe angazhimin në avancimin e aftësive të Forcës së Sigurisë së Kosovës. Në mjedisin aktual të sigurisë, paqja dhe stabiliteti rajonal, kontinental dhe global kërkojnë përpjekje të përbashkët në adresimin e shumë sfidave, kërcënimeve dhe rreziqeve të sigurisë. Shpesh këto sfida janë të paparashikueshme dhe paparashikueshmërisht komplekse. Kjo rikonfirmon besimin tonë të fortë që angazhimi dhe bashkëpunimi i të gjitha vendeve dhe kombeve është i domosdoshëm në parandalimin, menaxhimin dhe reagimin ndaj kërcënimeve të sigurisë të kohës sonë. Dhe kështu, siguria bashkëpunuese mbetet detyra dhe angazhimi ynë kryesor”, ka thënë Kurti.


Ai ka thënë edhe se Qeveria është e përkushtuar që të avancojë kapacitetet e FSK-së në mënyrë që të shërbejë përkrah ushtrive të vendeve të NATO-s.

“Ne jemi mirënjohës për rolin e rëndësishëm që NATO, përmes KFOR -it, ka luajtur në zhvillimin e sektorit tonë të sigurisë dhe në ruajtjen e një mjedisi të sigurt në Kosovë. Sidoqoftë, ne duhet të vazhdojmë të ngrisim institucionet tona për të siguruar mbrojtje dhe siguri për të gjithë qytetarët e vendit tonë, nga një komb që është konsumator i sigurisë te një që është ofrues i sigurisë. Qeveria është e përkushtuar që të avancojë kapacitetet e Forcës së Sigurisë së Kosovës në mënyrë që të shërbejë përkrah ushtrive të vendeve të NATO-s në operacionet vitale të ruajtjes së paqes. Andaj, ne jemi duke i bërë një analizë aspekteve të ndryshme të sektorit të sigurisë. Ministri i Mbrojtjes tashmë ka propozuar ndryshimin e ligjeve të mbrojtjes, që tashmë është miratuar nga Qeveria. Shpresoj që të gjithë ju do të mund ta mbështesni Ministrinë e Mbrojtjes në këtë çështje me ekspertizë profesionale nga vendet e juaj” u shpreh ai.

Ai ka vazhduar fjalimin e tij duke thënë se, “Republika e Kosovës synon të anëtarësohet dhe integrohet në strukturat euroatlantike që janë thelbësore për vendin tonë. Ne jemi të përkushtuar të jemi eksportues të sigurisë rajonale dhe ndërkombëtare. Në të vërtetë, siguria kombëtare e Kosovës ndërthuret me sigurinë rajonale dhe atë më të gjerë euroatlantike. Shpresojmë që në të ardhmen e afërt të bëhemi anëtar i plotë në Kartën e Adriatikut, dhe në të gjitha nismat e tjera rajonale, si dhe të kontribuojmë në sigurinë rajonale e transnacionale. Prandaj, e kërkojmë mbështetjen e të gjithë juve ashtu që të bëhemi anëtar i plotë i nismave rajonale dhe t’u bashkohemi fqinjëve tanë në ballafaqimin e kërcënimeve të reja në rajon, Evropë dhe më gjerë. Është në interesin e Republikës së Kosovës dhe sigurisht në interesin e të gjitha vendeve të rajonit, që të promovojmë dhe thellojmë bashkëpunimin e forcave tona”.

Kryeministri tha edhe se Kosova do të donte të merrte pjesë në bashkimin dhe shpërndarjen e kapaciteteve me fqinjët dhe se është e gatshme të kontribuojë në operacionet rajonale dhe ndërkombëtare.

“Pavarësisht burimeve të kufizuara dhe kufizimeve buxhetore, Kosova do të donte të merrte pjesë në bashkimin dhe shpërndarjen e kapaciteteve me fqinjët tanë. Kosova është e gatshme të kontribuojë në operacionet rajonale dhe ndërkombëtare”, theksoi kryeministri Kurti.

Lexo edhe

Video