Kurti flet për takimin me Ramën: Tri temat që diskutuam

Kryeministri Albin Kurti, gjatë konferencës së sotme për media, është pyetur edhe rreth takimit të së martës në Tiranë me kryeministrin e Shqipërisë, Edi Rama. Shefi i ekzekutivit kosovar u shpreh se në këtë drekë pune është folur për sigurinë kibernetike, krizën energjetike si dhe takimin e Procesit të Berlinit që pritet të mbahet në fillim të nëntorit.

Kurti u shpreh se takimi ka qenë shumë konstruktiv e pozitiv ndërsa mohoi se ëhstë përmendur çështja e Ballkanit të Hapur.

“Takim i djeshëm ka qenë një drekë pune me kryeministrin e Shqipërisë, Edi Rama, dhe ka qenë një takim shumë i mirë, konstruktiv e pozitiv dhe i nevojshëm për shkak të temave që i kemi diskutuar e para është siguria kibernetike. Kjo ka qenë tema e diskutimit tonë dhe isha shumë i interesuar të marrë vesh sa më shumë për përvojën e tyre me sulmet e fundit që kanë qenë me të vërtetë shumë të dëmshme e kriminale. Tema e dytë ka qenë sfidat e energjisë në javët e muajt në vijim në kuptimin e furnizimit të qëndrueshëm dhe të çmimeve të përballueshme ku ju e dini se KEK dhe KESH bashkëpunojnë ngushtë, ne tash gjatë verës u kemi dhënë shumë energji elektrike në Shqipëri në mënyrë që ata të na ndihmojnë pastaj gjatë dimrit dhe kemi diskutuar për situatën energjetike në përgjithësi… Tema e tretë ka qenë përgatitjet në dritën e rifillimit të Procesit të Berlinit, kësaj radhe me kancelarin e ri gjerman Olaf Scholz sepse ju e dini që takimet e mëhershme në kuadër të Procesit të Berlinit janë bërë me zonjën Merkel e tashmë për herë të parë bëhet nga kancelari Scholz dhe ka shumë punë të ekipeve tona dhe shumë bashkëpunim paraprak drejt mbledhjes së radhës së Procesit të Berlinit”, deklaroi Kurti.


Kurti institoi që nuk është diskutuar fare për Ballkanin e Hapur por vetëm për Procesin e Berlinit.

“Në drekën që kemi pasur dje nuk është përmendur ‘Open Balkans’, ose ‘Open Balkan’, nuk e di a është me ‘s’ në fund apo pa ‘s’, por ajo që mund të them është se kemi diktuaur për përgatitjet sa i përket procesit të Berlinit”, përfundoi Kurti.

Gjatë ditës së martë, Kurti gjatë konferencës për media me ministrat Nagavci dhe Murati, u largua me arsyetimin “e një takimi urgjent” dhe u pa në Tiranë me kryeministrin e Shqipërisë, Edi Rama.

Lexo edhe

Video

Komentet janë të mbyllura.