"Kurora e muajit të agjërimit", Tërnava: Fitër Bajrami, dita kur duhet të jemi më pranë njëri-tjetrit
Lajme
Lexohet për: 4 min.
Dëgjoje me zë...
"Kurora e muajit të agjërimit", Tërnava: Fitër Bajrami, dita kur duhet të jemi më pranë njëri-tjetrit
19/03/2026 - 12:34
Linku u kopjua
Myftiu i Kosovës, Naim Tërnava në ditën e fundit të muajit të shenjtë të Ramazanit, iu është drejtuar besimtarëve myslimanë për festën e Fitër Bajramit, dhe tha se muaji i Ramazanit ishte një periudhë e edukimit të thellë shpirtëror dhe moral për besimtarët, duke theksuar se kjo festë përfaqëson kulmin e një rrugëtimi të përkushtimit dhe devotshmërisë.
Ai deklaroi se Ramazani shërbeu si një shkollë e lartë e edukimit shpirtëror, ndërsa Fitër Bajrami vjen si manifestim i vlerave më të larta njerëzore dhe hyjnore, duke përcjell mesazhe paqeje, solidariteti dhe përgjegjësie shoqërore.
“Pas një udhëtimi të gjatë shpirtëror, të mbushur me përkushtim, sakrificë dhe devocion, gjatë muajit të bekuar të Ramazanit, nesër po e presim me gëzim të madh festën e Fitër Bajramit. Ky muaj i begatë ishte një shkollë e lartë e edukimit shpirtëror dhe moral, ku besimtari u përpoq të pastrojë zemrën, të disiplinojë shpirtin dhe të afrohet më shumë me Zotin e madhërishëm. Në përjetimin e agjërimit, lutjes dhe solidaritetit, ne rikthyem ekuilibrin e brendshëm dhe forcuam lidhjen tonë me krijuesin dhe me njëri-tjetrin. Ramazani na mësoi se besimi nuk është vetëm fjalë, por përkushtim i gjallë. Ai na edukoi në durim, në sinqeritet dhe në përgjegjësi, duke na kujtuar se njeriu e arrin madhështinë e tij përmes përulësisë dhe devotshmërisë”, tha ai.
Myftiu theksoi se Ramazani dëshmoi se besimi kërkon përkushtim të vazhdueshëm dhe përgjegjësi.
“Ky muaj na bëri të vetëdijshëm për përgjegjësinë tonë ndaj Zotit, ndaj vetvetes dhe ndaj shoqërisë, duke e forcuar ndjenjën e solidaritetit dhe të dhëmbshurisë për ata që janë në nevojë. Në përvojën e përbashkët të sofrës së iftarit, ky muaj i bekuar kultivoi ndjenjën e barazisë, forcoi unitetin, thelloi solidaritetin dhe ringjalli shpresën, duke na rikujtuar se dera e mëshirës së Zotit të madhërishëm mbetet përherë e hapur për zemrat e pastra dhe të sinqerta. Të dashur besimtarë, Fitër Bajrami është kurora e këtij rrugëtimi shpirtëror. Ai nuk është vetëm një festë gëzimi, por një manifestim i vlerave më të larta njerëzore dhe hyjnore”.
Ai gjithashtu tha se Fitër Bajrami përfaqëson kurorën e këtij rrugëtimi shpirtëror dhe është ditë e reflektimit mbi përgjegjësinë individuale dhe kolektiv.
“Në këtë ditë, zemrat mbushen me paqe, falje dhe dashuri. Ndërsa besimtari e ndjen më fuqishëm përgjegjësinë e tij si mëkëmbës i Zotit në tokë, për të përhapur të mirën dhe për të ndërtuar një shoqëri të drejtë e të moralshme. Në traditën tonë, Fitër Bajrami është festë e bashkimit, e pajtimit dhe e humanizmit. Është dita kur hapen zemrat, kur shtrihen duart e pajtimit dhe kur forcohen lidhjet familjare e shoqërore. Sofrat tona mbushen me begati, por mbi të gjitha me dashuri, respekt dhe mirënjohje. Kjo festë na kujton se gëzimi i vërtetë është ai që ndahet me të tjerët. Kjo është dita kur duhet të jemi më pranë njëri-tjetrit, më të kujdesshëm ndaj të varfërve, jetimëve, të moshuarve e të sëmurëve”, tha Tërnava.
Myftiu Tërnava theksoi se kjo festë mbetet simbol i bashkimit, pajtimit dhe humanizmit, duke bërë thirrje për solidaritet të shtuar ndaj shtresave në nevojë.
“Bajrami na mëson se humanizmi nuk është vetëm një ndjenjë, por një detyrim moral dhe shpirtëror që duhet të shoqërojë jetën tonë të përditshme. Mesazhi i Fitër Bajramit është paqja, solidariteti dhe dinjiteti njerëzor, në një kohë kur bota po përballet me konflikte dhe luftëra që po marrin jetë të pafajshme. Kjo festë na fton të lutemi për paqe dhe të angazhohemi për ndërtimin e një bote më të drejtë. Lutemi që Zoti i madhërishëm ta udhëzojë njerëzimin, t'u japë fund luftërave, t'i ndalë vuajtjet dhe të sjellë paqe e mirëkuptim në botë. Fitër Bajrami na rikujton edhe fisnikërinë e njeriut dhe misionin e tij në tokë”, përfundoi Tërnava.
