Ambasada e Kosovës në Emiratet e Bashkuara Arabe ka një thirrje të veçant për të gjithë qytetarët e vendit tonë dhe vizitorët turistikë që aktualisht ndodhen të bllokuar në Emiratet e Bashkuara Arabe.

Në njoftim të kësaj ambasade, thuhet se në përputhje me vendimin e autoriteteve përkatëse në Emirate, të gjithë mysafirëve që u ka përfunduar afati i check-out-it, por që nuk kanë mundësi të udhëtojnë për arsye jashtë kontrollit të tyre, do t’u zgjatet qëndrimi në objektet hoteliere ku janë të akomoduar aktualisht.

Sipas autoriteteve, shpenzimet e qëndrimit do të mbulohen nga data kur është pamundësuar udhëtimi, deri në momentin kur largimi nga vendi të bëhet i mundur.

Kjo ambasadë u bën thirrje të gjithë qytetarëve që ndodhen në këtë situatë të komunikojnë me menaxhmentin e hotelit ku janë të vendosur dhe, për çdo paqartësi shtesë, të kontaktojnë drejtpërdrejt Ambasadën.

“Shpenzimet e qëndrimit do të mbulohen nga data e pamundësisë së udhëtimit deri në datën kur bëhet e mundur largimi. Lusim të gjithë qytetarët që ndodhen në këtë situatë të komunikojnë me menaxhmentin e hotelit ku janë të akomoduar dhe, për çdo paqartësi shtesë, të kontaktojnë Ambasadën. Ambasada e Republikës së Kosovës mbetet në dispozicionin tuaj për çdo informatë dhe asistencë të nevojshme”, thuhet në njoftim.

Sipas mediave ndërkombëtare, Irani ka kryer sulme ajrore edhe në Dubai, ku jeton një komunitet i konsiderueshëm nga Kosova dhe Shqipëria.

/Kosovapress/