Të paktën katër persona kanë humbur jetën pasi uragani Debby ka goditur Floridën, duke i lënë banorët të përballen me përmbytje dhe ndërprerje të energjisë elektrike.

Autoritetet thanë se viktimat përfshinin një 13-vjeçar, i cili vdiq kur një pemë ra në shtëpinë e tij në qytetin Levy County, afër Gainesville.

Në një incident të veçantë, në qarkun Hillsborough - pjesë e zonës metropolitane Tampa - drejtuesi i një automjeti humbi kontrollin dhe u fut në një kanal gjatë stuhisë, thanë autoritetet. Më pas shoferi u gjet i vdekur.

Në qarkun Dixie, në perëndim të Gainesville, zyrtarët raportuan se një grua dhe një 12-vjeçare humbën jetën kur makina e tyre u përplas të dielën mbrëma.

Sistemi i motit u forcua në një uragan të kategorisë së parë vonë të dielën dhe doli në breg pranë Steinhatchee sot në mëngjes, tha Qendra Kombëtare e Uraganeve (NHC).

Tani pritet të lëvizë ngadalë, me erëra me shpejtësi deri në rreth 129 kilometra në orë. Rreth 242 mijë shtëpi dhe biznese janë pa energji elektrike, sipas PowerOutage.com.

Guvernatori i Floridës Ron DeSantis shpalli gjendjen e jashtëzakonshme për 61 nga 67 qarqet e Floridës. Ai tha gjithashtu se ekipet e shërbimeve nga brenda dhe jashtë shtetit janë gati të ndihmojnë në rivendosjen e energjisë pas stuhisë.

Parashikuesit paralajmëruan se sezoni i uraganeve, i cili zgjat nga 1 qershori deri më 30 nëntor, do të jetë shumë i ngarkuar, me 25 stuhi të emërtuara, ku 8 deri në 13 prej tyre mund të shndërrohen në uragane.

Mendohet se ndryshimet klimatike mund t'i bëjnë më të mundshëm uragane të ngadalta. Ndërsa bota nxehet në mënyrë të pabarabartë, kjo shkakton ndryshime në qarkullimin atmosferik që drejton stuhitë në të gjithë planetin. /BBC