Interi ka bërë të ditur se Hakan Calhanoglu ka pësuar një sforcim në aduktorët e kofshës së majtë dhe sipas “Sky Sport Italia”, ai dhe Francesco Acerbi ka të ngjarë të humbasin ndeshjen e së dielës kundër Juventusit.

Calhanoglu dhe Acerbi pësuan lëndime muskulore në pjesën e parë të fitores 1-0 të Interit ndaj Romës të dielën mbrëma. “Nerazzurrët” lëshuan një përditësim mjekësor për mesfushorin turk, i cili i ishte nënshtruar testeve mjekësore në mëngjes.

“Hakan Calhanoglu iu nënshtrua një skanimi MRI këtë mëngjes në Institutin Klinik Humanitas në Rozzano pas zëvendësimit të tij në ndeshjen e djeshme kundër Romës.Testet zbuluan një tendosje në aduktorët e kofshës së tij të majtë”, tha Inter në një deklaratë, përcjellë KosovaPress.

Nga ana tjetër, sipas korrespondentëve të “Sky Sport Italia”, Matteo Barzaghi dhe Andrea Paventi, Acerbi është diagnostikuar me të njëjtin dëmtim.

Kjo do të thotë që të dy lojtarët do të humbasin ndeshjen e së mërkurës në Champions League kundër Young Boys dhe janë në dyshime serioze për ndeshjen e radhës në Serie A kundër Juventusit më 27 tetor.

Kristjan Asllani gjithashtu ka munguar në stërvitjen e sotme dhe nuk do të jetë në dispozicion ndaj Young Boys, ndërsa Piotr Zielinski është stërvitur pjesërisht me pjesën tjetër të skuadrës të hënën dhe mund të kualifikohet për ndeshjen e radhës.