Sistemi prokurorial i Kosovës ka dështuar të jetë transparentë dhe se përbërja e Këshillit Prokurorial të Kosovës tërësisht thuajse nga prokurorët paraqet rrezik për korporatizëm. Kështu thotë raporti “Si duket korporatizmi dhe pandëshkueshmëria në sistemin prokurorial”, i publikuar nga Instituti i Kosovës për Drejtësi (IKD).

Disa nga gjetjet e këtij raporti janë se KPK shqipton masa të buta karshi shkeljeve disiplinore që bëjnë prokurorët, e po ashtu nuk respektohet kuota gjinore, derisa kandidimi i emrave të njëjtë për pozita udhëheqëse në këtë institucion shihet si pengesë për reformë në sistemin prokurorial të Kosovës.

Hulumtuesi i IKD-së, Flamur Kabashi u shpreh se KPK ka dështuar të jap rezultate konkrete në luftimin e korrupsionit.

Ai thotë se përbërja aktuale tërësisht me prokurorë paraqet rrezik për korporatizëm në sistemin prokurorial të Kosovës.

Kabashi nga IKD thotë se Këshilli Prokurorial shqipton masa të buta karshi shkeljeve disiplonore të prokurorëve.

Ky raport ka gjetur se aktakuzat janë të dobëta, prandaj edhe dështojnë të konfirmohen sidomos për rastet e korrupsionit.

Raporti thekson faktin që pozita e Kryeprokurorit të Shtetit vazhdon të jetë me ushtrues detyre dhe se ridërgimi i prokurorit, Blerim Isufaj për dekretim nga presidentja e Kosovës, Vjosa Osmani është veprim kundër kushtetuese.

Deona Kamberaj po ashtu hulumtuese në IKD thotë se nga ky raport del se KPK-ja ka shkelur kuotën gjinore të cilën ajo e kishte përcaktuar vetë në Rregulloren e saj.

Kamberaj theksoi se Këshilli Prokurorial i Kosovës ka ndërmarrë edhe veprime të kundërligjshme gjatë transformimit të prokurorëve.

Raporti “Si duket korporatizmi dhe pandëshkueshmëria në sistemin prokurorial”, u publikua në kuadër të “Javës Kundër Korrupsionit 2024”, i cili organizohet nga Koalicioni i Organizatave të Shoqërisë Civile (IKD, FOL, INPO) me moton “Bashkë Kundër Korrupsionit”.