Shefja e Grupit parlamentar të Lëvizjes Vetëvendosje, Mimoza Kusari-Lila, ka reaguar pasi deputetët e Listë Serbe erdhën sot në Kuvend për t’u paraqitur një herë në çdo gjashtë muaj sa për të marrë pagat e rregullta.

Konjufca i ashpër me deputetët e Listës Serbe: Turp iu qoftë • KosovaPress

Në një postim në Facebook, Kusari-Lila tha se deputetët e Listës Serbe gjatë gjithë kohës mbështesin politikat destabilizuese të presidentit serb duke bojkotuar Kuvendin e Kosovës dhe mbështetur përgjegjësin për sulme terroriste të Banjskës Milan Radoiçiq.

Postimi i plotë:

Provokuan, krah i terroristëve dhe atyre që mbështesin politikat agresive të Vuçiqit

Sot vazhduam me një agjendë dinamike legjislative. U miratuan një grup ligjesh që bartin potencialin për zhvilluar një mori sektorësh.

Të gjitha ato kanë në qendër mirëqenien e qytetarëve dhe forcimin e institucioneve te shtetit tonë.

Po ashtu sot ishim dëshmitarë të një provokimi nga ana e deputetëve të Listës Serbe.

Ata siç e kanë bërë zakon shfaqen një herë në 6 muaj e në ndërmjet i bëhen krah jo qytetarëve të Kosovës, por terroristëve dhe gjithë atyre që i mbështesin politikat agresive të Vuçiq.

Po siç e tha Kryetari i Kuvendit Glauk Konjufca s’kanë çka kërkojnë mbështetësit e kryeterroristit në Kuvendin e qytetarëve. Kjo legjislaturë u ka dhënë qytetarëve mbi 300 ligje të reja.

Ndërsa sot midis të tjerave u miratuan Ligji për Byronë e konfiskimit të pasurisë së paligjshme, Ligji për banimin social dhe të përballueshëm dhe Ligji për sigurimin e detyrueshëm shëndetësor. Urime dhe puna vazhdon pa ndalur!